Jyl basynan beri mobıldi kólik júrgizýshileri 10 myńǵa jýyq jol qozǵalysy erejesin buzǵan.
Buǵan deıin Almaty polısıasy kóktem, jaz mezgilinde, jalpy qaladaǵy jol-kólik oqıǵalarynyń jaǵdaıyna áser etetin jekelegen kólik túrleriniń qozǵalysyn qadaǵalaýdy kúsheıtken bolatyn, dep habarlaıdy Almaty-akshamy.kz.
Polisia.kz habarlaýynsha, dese de, motosıkl men moped júrgizýshileri eskertýlerdi qulaqqa asar emes, azamattardyń tynyshtyǵyn buzý faktileri kóptep kezdesedi,
«Tájirıbede motosıklder men mopedterdiń ıeleriniń tikeleı aǵyndy qondyrǵyny qoldanýy jıi kezdesedi, bul azamattardyń tynyshtyǵyna áser etedi. Ásirese túngi ýaqytta jáne ruqsat etilmegen jarystardy uıymdastyrady, sondaı-aq manevr jasaý jáne jyldamdyqty shekteý erejelerin óreskel buza otyryp, toptyq uıymdastyrylmaǵan qozǵalystar jasaıdy. Bul qala turǵyndary men basqa da jol qozǵalysyna qatysýshylardyń shaǵymdaryn týdyrady. Sonymen qatar, kún saıyn derlik bizdiń esepterimizde motokólikterdiń qatysýymen bolǵan jol-kólik oqıǵalarynyń qaıtalanatyn derekteri tirkeledi», – dedi Almaty qalalyq PD jergilikti polısıa qyzmeti basqarmasy bastyǵynyń orynbasary Serik Shýmaev.
Spıkerdiń aıtýynsha, balamaly kólik túrlerin paıdalanatyn adamdardyń quqyq buzýshylyqtaryn anyqtaý jumystary kúsheıtildi. Máselen, aldyn alý sharasynyń bir kúninde aldyńǵy sheptegi bólimsheler moped jáne motosıkl júrgizýshileriniń 60-tan astam jol erejesin buzý deregi anyqtady. Jyl basynan beri mobıldi kólik júrgizýshileri 10 myńǵa jýyq jol qozǵalysy erejesin buzǵan. Jalpy aıyppul kólemi 70 mıllıon teńgeden asty.
Sondaı-aq jergilikti polısıa qyzmetiniń málimetinshe, Almatyda mopedterdiń qatysýymen 250 jol-kólik oqıǵasy bolǵan. Saldarynan 10 adam qaza tapty. Mopedter men motosıkl júrgizýshileriniń qatysýymen bolatyn jol-kólik oqıǵalarynyń negizgi sebepteri, negizinen belgilengen jyldamdyqty saqtamaý, qarsy jolaqqa shyǵý, qıylystardan ótý erejelerin buzý, manevr jasaý jáne taǵy da basqa buzýshylyqtar.