«Eńbek resýrstaryn damytý ortalyǵy» AQ sarapshylary daıyndaǵan 2050 jylǵa deıingi demografıalyq boljamǵa sáıkes 2026 jylǵa qaraı Qazaqstanda jumys kúshiniń sany 9,5 mln adam shamasynda bolady. Bul týraly Eńbek jáne halyqty áleýmettik qorǵaý mınıstrligi málimdedi, dep habarlaıdy Almaty-akshamy.kz.
«Eńbek resýrstaryn damytý ortalyǵy» AQ málimetinshe, 2028 jyldan bastap jumys kúshiniń sany belsendi óse bastaıdy jáne 2050 jylǵa qaraı 12 mln adamǵa jetedi.
«2027 jylǵa deıin jumys kúshiniń kórsetkishi obektıvti faktorlarǵa baılanysty az nemese múldem óspeıdi dep kútilýde. Bizde jumys kúshiniń azdy-kópti belsendi ósýi shamamen 2028 jyldan bastalady dep kútilýde. 2031 jylǵa qaraı biz 10 mıllıon adamǵa, 2040 jylǵa – 11 mıllıonǵa jaqyndaımyz. Osylaısha, jumys kúshi jylyna shamamen 100 myń adamǵa ósedi. 2050 jylǵa qaraı biz 12 mln adamnan turatyn deńgeıge jetemiz, bul 2023 jylmen salystyrǵanda (9,256 mln) ósim 28%-dy quraıdy», – dedi ERDO Boljaý jáne zertteý departamentiniń dırektory Dmıtrıı Shýmekov.
Óńirler boıynsha alǵanda birinshi kezekte megapolısterde, onyń ishinde Astanada jumys kúshiniń ósimi kútilýde, onda 2050 jylǵa qaraı ósim 2,4 ese bolýy múmkin. Almatyda jumys kúshi is júzinde eki esege artady, Mańǵystaý jáne Almaty oblystarynda onyń sany 80 %-ǵa ósedi.