Qalada V jáne A tıpti tumaý vırýstary (H3N2) aınalymda
Almatyda jiti respıratorlyq vırýstyq ınfeksıany (JRVI) balalar kóp juqtyrǵan, dep habarlaıdy Almaty-akshamy.kz Almaty qalalyq sanıtarlyq-epıdemıologıalyq baqylaý departamentine silteme jasap.
Ótken aptada qalada JRVI-diń 21 972 jaǵdaıy tirkelgen. Bul ótken aptadaǵy kórsetkishten 13,8% - ǵa joǵary. Degenmen, qalada JRVI-men aýyrý balalar arasynda kóp tirkeldi. Olardyń úles salmaǵy 66,9%- dy qurady.
Sondaı-aq, aǵymdaǵy epıdemıologıalyq maýsym bastalǵaly beri qalada V jáne A tıpti tumaý vırýstary (H3N2) aınalymda. Jalpy tumaýmen syrqattanýdyń 115 jaǵdaıy tirkeldi. Onyń ishinde V tıpti 114 jaǵdaı jáne A tıpti (H3N2)-1 jaǵdaı, barlyq naýqastar em aldy.
Osyǵan baılanysty, qalalyq sanıtarlyq-epıdemıologıalyq baqylaý departamenti qala turǵyndaryn JRVI, tumaýǵa qarsy aldyn alýdyń jalpy sharalaryn saqtaýǵa shaqyrdy.
- JRVI-men aýyratyn naýqastarmen janasýdan aýlaq bolyńyz, al eger baılanys sózsiz bolsa, onda maska kıip, oksolın maıyn qoldanyńyz;
- aýrýǵa shaldyqqan jaǵdaıda úıde bolý, ózin-ózi emdeýmen aınalyspaý, medısına qyzmetkerin shaqyryp, otbasy ortasynda nemese ujymda bolǵan kezde maska kıý, dárigerdiń taǵaıyndaýy boıynsha em alý qajet;
- túshkirý jáne jótel kezinde aýzyńyzdy qolyńyzben, maılyqpen, oramalmen jaýyp, qolyńyzdy múmkindiginshe jıi jýyńyz;
- ımýndyq júıeni arttyrý: S vıtamınin jáne dárigerdiń usynysy boıynsha basqa dári-dárimekterdi qoldaný;
- JRVI jáne tumaý aýrýlarynyń órshýi kezeńinde qashyqtyqty saqtaý, buqaralyq is - sharalarǵa (sonyń ishinde aldaǵy jańa jyldyq korporatıvter men merekelerge) barýdy qysqartý, al aýrý belgileri bar adamdarǵa - úıde bolý jáne dárigerdiń nusqaýy boıynsha em alý usynylady;
- ylǵaldy tazalaýmen úı-jaılardy jıi jeldetý kerek;
- syrqattanǵan balalardy uıymdastyrylǵan ujymdarǵa, mektepke deıingi balalar mekemelerine, ásirese, jańajyldyq erteńgilikter men shyrshalarǵa jibermeý.