Qalaǵa sapaly joldar qajet.
Almatyda qala ákimi Erbolat Dosaevtyń tóraǵalyǵymen 2023 jylǵa arnalǵan jol jumystarynyń josparlaryn talqylaý jáne jol-jóndeý jumystarynyń maýsymyna daıyndyq boıynsha keńes ótti, dep habarlaıdy Almaty-akshamy.kz
Keńeske ákimdiktiń beıindi basqarmalary men vedimistik baǵynysty uıymdarynyń basshylary, aýdan ákimderi, jol qurylysy salasynda tehnıkalyq qadaǵalaýdy júzege asyratyn merdigerlik uıymdar men kompanıalardyń ókilderi qatysty.
Erbolat Dosaev qys mezgilinen keıin qala turǵyndary joldardyń qazirgi jaǵdaıyna laıyqty narazylyq týdyratynyn atap ótti.
«Shuńqyrlardyń paıda bolýyna, lúkterdiń túsýine jáne qysta komýnaldyq kásiporyndardyń apatty jáne josparly qazýlar júrgizýine baılanysty joldardy aǵymdaǵy jóndeýdi júrgizý máselesi ótkir tur. Turǵyndar tarapynan jumystyń keshigýine baılanysty kóshelerdiń uzaq jabylýyna qatysty turaqty jáne ádil shaǵymdar bar. Jumystarǵa selqos qaraý, formalızm jáne sapa deńgeıiniń tómendigi, bekitilgen standarttar, tájirıbe kórsetkendeı, oń nátıje bermeýde. Qalaǵa sapaly joldar qajet. Jumysty durys júrgize almaıtyn kompanıalar endi qalada jol jóndeý jumystarymen aınalyspaıdy», - dedi qala ákimi.
Almaty ákimi merdigerlik uıymdar ótken jyly jibergen barlyq kemshilikterdi qysqa merzimde joıýdy tapsyrdy. Qala ákiminiń tapsyrmasy boıynsha turǵyndardy aldyn ala habardar etý jáne prosesterdiń ashyqtyǵyn, merdigerlik uıymdardyń eseptiligi men tártibin arttyrý úshin vedimistik saraptamadan ótkennen keıin ýchaskeler men oryndaý merzimderi kórsetilgen jumys kestesi jarıalanatyn bolady.
Aǵymdaǵy jyly qalanyń bes shaǵyn aýdanynda (Qaırat, Alǵabas, Aqjar, Shuǵyla jáne Shańyraq-1) jol salý josparlanýda.
Qalada ortasha jóndeýmen uzyndyǵy 200 km-den asatyn 220 kóshe, aǵymdaǵy jóndeýmen 350 myń sharshy metrden astam kóshe qamtylady. Bul maqsattarǵa tıisinshe 20 mlrd teńge jáne 2,8 mlrd teńge bólindi.
Sondaı-aq, uzyndyǵy 30 km trotýarlar men 40 aıaldama keshenin jóndeý josparlanýda.
Erbolat Dosaev bıyldan bastap ókilettikterdi ortalyqsyzdandyrý jáne jekelegen búdjetterdi aýdan ákimdikterine bólý aıasynda jol tóseminiń aǵymdaǵy jóndelýi men jaı-kúıi úshin aýdan ákimdikteri jaýapty bolatynyn atap ótti. Qala basshysy olardy joldardaǵy kemshilikterdi joıý boıynsha jedel sharalar qabyldaýǵa mindettedi.
Qala basshysy jol tóseminiń sapasyn qamtamasyz etý jáne merzimderdi saqtaý úshin ınjenerlik jelilerdi tóseý jáne joldardy keıinnen jóndeý jumystaryn sınhrondaý qajettigin atap ótti. Energetıka jáne sýmen jabdyqtaý basqarmasyna turǵyndar men jeke kompanıalar tarapynan keıingi jeke qazýlardy boldyrmaý maqsatynda ınjenerlik jelilerdi abonentterge tikeleı jetkizýdi qamtamasyz etý tapsyryldy. Aýdan ákimdikterine turǵyndar arasynda aqparattyq jumysty kúsheıtý tapsyryldy-joldardy jóndeý jáne salý ınjenerlik jelilerdi salý jumystary aıaqtalǵannan keıin ǵana múmkin jáne oryndy bolady.
Keńes barysynda Erbolat Dosaev búginde joldardyń eń ózekti máseleli lúkter ekenin atap ótti. Olardyń sapasyzdyǵyna jáne tóseý tehnologıasynyń buzylýyna baılanysty asfált barlyq jerde shógedi, shuńqyrlar, ketikter men jaryqtar paıda bolady. Mundaı jaǵdaılardyń aldyn alý úshin ótken jyly Almaty ákiminiń tapsyrmasy boıynsha testilik rejımde qalada shetelde qoldanylatyn «qalqymaly» korpýstary bar jańa tehnologıa boıynsha 25 lúk ornatyldy. Halyqaralyq tájirıbe negizinde asfálttyń oıyq túzilýin tómendetý úshin Gogol kóshesiniń úsh ýchaskesinde polımerlerdi qoldana otyryp, asfáltbeton qospasyn pılottyq paıdalaný boıynsha synaqtar jalǵasýda. Jańa sheshimder óziniń tıimdiligin kórsetti jáne kúzgi-qysqy kezeńde júktemelerge tótep berdi. Erbolat Dosaev olardy ortasha jóndeý jáne jańa joldar salý kezinde keńinen qoldanýdy tapsyrdy.
Keńes barysynda joldardaǵy qaýipsizdik máselelerine erekshe nazar aýdaryldy. Aǵymdaǵy jyly 220 mekteptiń janynda 270 rettelmeıtin jaıaý júrginshiler ótkeli jaryqtandyrylady. Ortasha jóndeý sheńberinde Vision Zero tujyrymdamasy aıasynda jol qozǵalysyna qatysýshylardyń qaýipsizdigin qamtamasyz etý jónindegi jumystar jalǵasatyn bolady. Qala ákimdigi qaýipsizdik bólikterin ornatý jáne velosıped jolaqtarynda 4 myń sıgnaldyq bollard ornatý jumystaryn josparlaýda. 179 obektide rettelmeıtin jaıaý júrginshiler ótkelderi ornalasqan jerlerde dybys jolaqtaryn salý josparlanýda.
Merdigerlik uıymdardyń úzdiksiz jumysyn qamtamasyz etý, sondaı-aq jaýapkershilik aımaǵyn arttyrý úshin Almaty ákimi 3 jyl merzimge jol júrisi qaýipsizdigin qamtamasyz etý (jol júrisin retteýdiń tehnıkalyq quraldaryna qyzmet kórsetý jáne ustaý) jónindegi jumystarǵa shart jasasýdy qamtamasyz etýdi tapsyrdy.
Jalpy, «Almaty qalasyn 2025 jylǵa deıin damytý baǵdarlamasy jáne 2030 jylǵa deıingi orta merzimdi perspektıvalaryn» iske asyrý aıasynda aǵymdaǵy jyly avtomobıl joldarynyń úlesin jaqsy jáne qanaǵattanarlyq jaǵdaıda 89%-ǵa (2022 jyly – 86%), 2025 jylǵa qaraı 95%-ǵa deıin jetkizý josparlanýda.
Keńes qorytyndysy boıynsha Erbolat Dosaev jumystardyń sapasyn baqylaýdy kúsheıtýdi, merdiger uıymdardyń qurylys-jóndeý normalaryn saqtaýyn qamtamasyz etýdi jáne sharttyq mindettemeler oryndamaǵan jaǵdaıda – josyqsyz merdigerler tizimine engizýdi, materıaldardy quqyq qorǵaý organdaryna berýge deıin qatań sharalar qabyldaýdy tapsyrdy. Merdigerlik uıymdar jumys sapasyn arttyrý boıynsha sharalar qabyldaýǵa jáne atqarylǵan jumys úshin jaýapkershilikke tartylýǵa mindettendi.