Aldaǵy aptada 3 balǵa deıingi azdaǵan terbelister bolýy múmkin.
Bıyl Almatydy boljamdyq polıgonnyń aýmaǵynda kúshti ári joıqyn jer silkinisi kútilmeıdi. Bul týraly brıfıń barysynda Seısmologıa ınstıtýtynyń dırektory Dáýlet Sársenbaev aıtty, dep habarlaıdy Almaty-akshamy.kz.
«2023 jyly Almaty boljamdyq polıgonynyń aýmaǵynda 0,7 yqtımaldyǵymen Mѕ 5,6 magnıtýdasy, MSK-64 shkalasy boıynsha 7 jáne odan joǵary qarqyndylyǵy bar kúshti jer silkinisi kútilmeıdi», - dedi spıker.
Ol sondaı-aq qala turǵyndaryn úreıge boı aldyrmaýǵa shaqyrdy.
«Túrkıa men Sırıadaǵy joıqyn jer silkinisterinen soń, Tájikstan, Italıa men basqa da elderde tirkelgen seısmıkalyq oqıǵalardan soń, el azamattaryn sabyrǵa shaqyryp, BAQ-ta aıtylyp jatatyn dúrbeleń men arandatýshylyq shabýylǵa boı aldyrmaýǵa shaqyrǵym keledi. Qala turǵyndaryna bıyl Almaty boljamdyq polıgonynyń aýmaǵynda kúshti jáne joıqyn jer silkinisi kútilmeıdi.
Búgin bizde boljamdyq komısıanyń otyrysy ótti. Jıynnyń qorytyndysy boıynsha Almaty qalasy men Almaty oblysy aýmaǵynda kúshti ári joıqyn jer silkinisi bolmaıdy degen paıymǵa toqtadyq. Aldaǵy aptada bizdiń óńir úshin qalypty jaǵdaı bolyp sanalatyn 3 balǵa deıingi shamaly terbelister bolýy múmkin», - dedi Dáýlet Sársenbaev.
Búginde Almaty qalasy, Almaty jáne Jetisý oblystary kiretin boljamdyq polıgonnyń aýmaǵynda 47 stansıa jumys isteıdi.