Túrksib aýdanynda bıyl 342 úı talshyqty-optıkalyq baılanys jelisine qosyldy.
Telekomýnıkasıalyq ınfraqurylymdy damytý sheńberinde Almatyda joǵary jyldamdyqtaǵy ınternetke qosý jumystary jalǵasyp jatyr. Bul týraly qala ákimi Erbolat Dosaev Túrksib aýdanynyń turǵyndarymen kezdesý barysynda aıtty, dep habarlaıdy Almaty-akshamy.kz.
«Bıyl 342 úı talshyqty-optıkalyq baılanys jelisine qosyldy, onyń ishinde Qaırat shaǵyn aýdanynda - 317 jáne Álmerek shaǵyn aýdanynda – 25 úı. 2022 jyldyń sońyna deıin 25 myńǵa jýyq halyq turatyn Baým toǵaıy, Nıjnáá Pátıletka shaǵyn aýdandaryn qosý josparlanǵan»,- dedi qala ákimi.
Erbolat Dosaevtyń aıtýynsha, joldar men adam kóp jınalatyn jerlerdi beınebaqylaý júıesimen kóptep qamtý arqyly qaýipsizdikti qamtamasyz etýge kóp kóńil bólinedi.
«Bıyl joldardaǵy Sergek aparattyq-baǵdarlamalyq keshenderiniń sany 2 ese, ıaǵnı 82-den 160-qa deıin kóbeıtiledi (jelilik ýchaskelerde 141 apparatyq-baǵdarlamalyq keshen, qıylystarda 19).Qosymsha 322 beınebaqylaý kamerasy ornatylady, onyń 111-i jol qıylystaryna, 76-sy aýlalarǵa, 18-i parkter men skverlerge, 90-y bilim berý jáne densaýlyq saqtaý obektilerine, 15-i dinı obektilerge, 10-y bazarlarǵa ornatylady»,- dedi qala jetekshisi.