Máńgilik alaýǵa gúl shoqtaryn qoıý rásimi ótti.
Almatyda Uly Otan soǵysyndaǵy Jeńistiń 78 jyldyǵy merekelendi, dep habarlaıdy Almaty-akshamy.kz.
Dástúr boıynsha negizgi merekelik is-sharalar 28 gvardıashy-panfılovshylar atyndaǵy saıabaqta ótti, onda Almaty ákimi Erbolat Dosaevtyń qatysýymen Máńgilik alaýǵa gúl shoqtaryn qoıý rásimi ótti.
Uly Otan soǵysynyń ardagerleri, tyl eńbekkerleri, áskerı qyzmetshiler, quqyq qorǵaý organdarynyń ókilderi, qoǵam qaıratkerleri men qala turǵyndary qaza tapqan qazaqstandyq jaýyngerlerdi eske alý úshin bir mınýt únsizdikten keıin Dańq memorıalyna gúl shoqtaryn qoıdy.
Ardagerlerdiń qurmetine arnalǵan merekelik túski as kezinde ákim maıdangerlerdi merekemen quttyqtap, urys alańynda jáne eńbek maıdanynda kórsetken erlikteri úshin alǵysyn bildirip, zor densaýlyq, baqyt pen amandyq tiledi.
Óz kezeginde ardagerler qala basshylyǵyna nazar aýdarǵany úshin alǵys aıtyp, Almaty turǵyndary men barlyq qazaqstandyqqa beıbitshilik pen jaqsylyq tiledi. Sonymen qatar, olar estelikterimen bólisti, óleń oqyp, maıdan ánderin aıtty.
28 gvardıashy-panfılovshylar atyndaǵy saıabaqta áskerı tehnıka kórmesi ótti, qala turǵyndary men qonaqtary úshin dalalyq as úı uıymdastyryldy, merekelik konsert qoıylyp, qazaqstandyq ártister maıdan ánderi men soǵystan keıingi jyldardaǵy ánderdi oryndady.
Buǵan qosa, Almatyda B.Momyshuly monýmentine, T.Bıgeldınov, R.Qoshqarbaev memorıaldyq taqtasyna, Á.Moldaǵulova men M.Mámetova, S.Nurmaǵambetov eskertkishterine, S.Lýganskııdiń bústine, «Otan uldaryna máńgilik estelik» jáne «Otan úshin shaıqasta qaza tapqandarǵa máńgilik dańq» memorıaldaryna gúl shoqtaryn qoıý rásimderi ótti.
Jeńis kúnin merekeleý Sh. Ýálıhanov atyndaǵy skverde jáne Jibek Joly-Panfılov kósheleriniń qıylysynda da ótti. Konsertte «Almaty áýenderi» ártisteri, Abaı atyndaǵy QUOBT solıseri jáne basqa da mýzykalyq ujymdar óner kórsetti.
Mektepter men kolejderde áskerı qyzmetshilerdiń, ardagerlerdiń qatysýymen «Erlik sabaqtary», sonymen birge balalardy ár alýan ásker túrlerimen tanystyrý boıynsha sabaqtar jáne t.b. ótkizildi.
Soǵys jyldary maıdanǵa 1,3 mln qazaqstandyq shaqyryldy. Qazaqstannyń 100 myńnan astam sarbazy jaýyngerlik ordendermen jáne medaldarmen marapattaldy, 500-den astam adam Keńes Odaǵynyń Batyry atandy. Qazir Almatyda Uly Otan soǵysynyń 56 ardageri turady.
