Jeltoqsan oqıǵasynyń 35 jyldyǵyna oraı Almaty qalasy ákimdigi Qoǵamdyq damý basqarmasynyń tapsyrysymen «Almaty» telearnasy derekti fılm túsirdi
Jeltoqsan oqıǵasynyń 35 jyldyǵyna oraı Almaty qalasy ákimdigi Qoǵamdyq damý basqarmasynyń tapsyrysymen «Almaty» telearnasy «Jeltoqsan – El Táýelsizdiginiń bastaýy» atty derekti fılm túsirdi, dep habarlaıdy Almaty-akshamy.kz Almaty.tv-ge silteme jasap.
Jeltoqsan kóterilisiniń 35 jyldyǵyn atap ótý boıynsha Almaty qalasy ákimdigi Qoǵamdyq damý basqarmasynyń bastamasymen jyl basynan beri birneshe is-shara ótkizilip, «Almaty» telearnasynyń ǵımaratynda jeltoqsan kóterilisine qatysqan azamattarmen kezdesý uıymdastyryldy.
Kezdesýge jeltoqsan uıymdarynyń jetekshileri men músheleri, tarıhshy-ǵalymdar, telearnanyń shyǵarmashylyq ujymy qatysyp, Jeltoqsan kóterilisiniń 35 jyldyǵyna baılanysty túsiriletin derekti fılm, rolıkter toptamasyna usynylatyn spıkerler, tarıhshy-ǵalymdar men zertteýshiler, túsirilim lokasıalary men ýaqyty belgilendi.
Túsirilim jumystaryn uıymdastyrý barysynda «Jeltoqsan qoǵamy» qoǵamdyq birlestiginiń tóraǵasy, «Jeltoqsan» kóterilisine qatysýshy Nurlybek Qýanbaev, «Jeltoqsan – 86» qoǵamdyq uıymynyń jetekshisi Gúlbahram Júnis jáne «Jeltoqsan kóterilisi» qoǵamdyq birlestiginiń tóraǵasy Myrzaǵul Tájiǵululy, «Jeltoqsan jalaýy» qoǵamdyq birlestiginiń tóraıymy Úmit Bosmanova, «Jeltoqsan rýhy» qoǵamdyq birlestiginiń tóraǵasy Talǵat Rysqulbek, «Jeltoqsan juldyzdary» qoǵamdyq birlestiginiń tóraıymy Gúlmıra Baıatqyzy jáne basqa da uıym jetekshileri, múshelerimen redaktorlyq quram birneshe márte kezdesti. Onda jeltoqsan kóterlisine qatysty tarıhı tyń derekter men buryn-sońdy aıtylmaǵan oqıǵalar, beıneqor muraǵattary men jeke arhıvterdegi materıaldardy paıdalaný boıynsha suraqtar talqylandy.
«Almaty» telearnasynyń bas dırektory, jýrnalıs Nurjan Muhamedjanovanyń aıtýynsha, fılm aıasynda kóteriliske qatysqan 60-qa jýyq keıipker men tarıhshy-ǵalymdardan suqbat alynyp, 30-ǵa jýyq pikir jazylǵan. Qala ákimi Baqytjan Ábdiruly Saǵyntaevtyń tapsyrmasy boıynsha, Jeltoqsan kóterilisiniń 35 jyldyǵyna oraı uıymdastyrylǵan jáne basqa da memlekettik deńgeıde atqarylyp jatqan sharalardan ázirlengen beınematerıaldar toptastyrylǵan.
«Almaty qalasy ákimdigi Qoǵamdyq damý basqarmasynyń tapsyrysymen «Jeltoqsan – El Táýelsizdiginiń bastaýy» atty derekti fılm túsirý josparlanǵan bolatyn. 5 aıǵa jýyq ýaqyt ishinde «Almaty» telearnasy «Jeltoqsan – El Táýelsizdiginiń bastaýy» atty 60 mınýttyq televızıalyq joba ázirledi.
Fılmniń rejıseri – Atlan Býlybaev, redaktory – Aıdana Shalqarova, prodúseri – Aıgerim Asqarbaı jáne basqa da shyǵarmashylyq ujym músheleri bar.
Fılm aıasynda kóteriliske qatysqan 60-qa jýyq keıipker men tarıhshy-ǵalymdardan suqbat alynyp, 30-ǵa jýyq pikir jazyldy. Marqum Lázzat Asanovanyń anasy Altynaı Asanovadan tamyz aıynda suqbat alynǵan bolatyn. Ókinishke qaraı, Altynaı Asanova birneshe aptadan keıin baqılyqqa attandy. Fılmde belgili tarıhshy-ǵalym Talas Omarbektiń de pikiri engizilgen edi. Ózderińiz bilesizder, Talas aǵa da jaqynda ómirden ozdy...
Jobada tarıhshy zertteýshilerdiń derekteri men Jeltoqsan qaharmandarynyń tarıhı esteligi bar», – dedi «Almaty» telearnasynyń bas dırektory, jýrnalıs Nurjan Muhamedjanova.