Almatyda qala ákiminiń tapsyrmasymen stýdentterdi jataqhanaǵa ornalastyrý boıynsha shtab quryldy
Almaty ákimi Erbolat Dosaev jańa oqý jylyna daıyndyq jáne stýdentterdi jataqhanaǵa ornalastyrý máselesi boıynsha joǵary oqý oryndarynyń rektorlarymen kezdesti, dep habarlaıdy aqshamnews.kz
«Elimizdiń mańdaıaldy oqý oryndarynyń deni Almatyda ornalasqan, jyl saıyn myńdaǵan stýdent joǵary bilim alý úshin osynda keledi. Bizdiń mindetimiz – olarǵa sapaly bilim berý jáne jaıly jataqhanamen qamtamasyz etý», – dedi qala ákimi Erbolat Dosaev.
Shahar basshysy jataqhana máselesi tikeleı baqylaýynda ekenin atap, Almatyǵa oqýǵa kelgen stýdentterdiń jaǵdaıyn jasaý boıynsha qabyldanyp jatqan sharalardy talqylady. Sonyń biri almatylyq stýdentterdi jataqhanaǵa ornalastyrý máselesimen aınalysatyn arnaıy shtabtyń qurylýy.
Almaty qalasy ákimdiginiń stýdentterdi qoldaýǵa arnalǵan taǵy bir mańyzdy bastamasy – daǵdarys jáne jedel den qoıý jónindegi ahýaldyq ortalyqtardyń ashylýy.
Daǵdarys ortalyǵy ALT ýnıversıtetinde ornalasqan. Daǵdarys ortalyǵynyń mindeti basqa óńirden kelgen baspanasyz stýdentterge jedel qoldaý kórsetý jáne ýaqytsha ornalastyrý. Daǵdarys ortalyǵynda 70 oryn bar.
Ahýaldyq ortalyǵy Almaly aýdanyndaǵy jastardyń komúnıtı ortalyǵynyń bazasynda jumys isteıdi. 1 tamyzdan bastap ortalyq táýlik boıy jumys istep, stýdentterge ornalastyrý máselesi boıynsha jedel kómek kórsetýde. Ortalyq kún saıyn Qazaqstannyń túkpir-túkpirinen 1,5 myńnan astam qońyraý qabyldaıdy.
Sonymen qatar, qalanyń árbir joǵary oqý ornynda stýdentterge tikeleı qoldaý kórsetetin Ahýaldyq ortalyqtar ashyldy.
Aıta ketetin nárse, Almatydaǵy 35 joǵary oqý ornynda 199 myńnan astam stýdent bilim alyp jatyr, onyń 124 myńy – ózge óńirden kelgen stýdentter. Qalada 109 stýdenttik jataqhana bar, onda 36,2 myńnan astam stýdent turady. Jalpy qajettilik 28,7 myń oryn. Alaıda qala ákimi qoldaýymen qabyldanǵan sharalardyń nátıjesinde tamyz aıynyń sońynda tósek oryn tapshylyǵy 8,9 myń orynǵa deıin qysqardy.
Oqý jyly bastalǵanǵa deıin Almatyda 1920 oryndyq 6 jataqhana ashylady, al jyl sońyna deıin Almaty qalasy ákimdiginiń jobalyq keńsesiniń qoldaýymen 3105 oryndyq 4 nysandy paıdalanýǵa berý josparlanyp otyr. 2024 jyly jalpy 5025 oryndyq 10 nysandy, 2025-2026 jyldary 34 295 oryndyq 33 nysandy paıdalanýǵa berý kózdelgen.
Esterińizge sala keteıik, jataqhana qurylysyn tıimdi úılestirý úshin stýdenttik jataqhanalar qurylysy boıynsha jobalyq keńse jumys istep tur. Jobalyq keńseniń negizgi mindeti Almaty qalasynda jataqhanalar qurylysy boıynsha memlekettik baǵdarlamany iske asyrý jáne stýdentterdi turǵyn úımen qamtamasyz etý úshin qolaıly jaǵdaı jasaý. Jobalyq keńse ashylǵannan bastap 120 áleýetti ınvestor júgindi, onyń 67-si qazir jumysqa kirisken, bul qoldaý mehanızminiń tartymdylyǵyn kórsetedi.
Anyqtama úshin:
+77002551443, +77009509528 Jataqhana máselesi boıynsha jedel den qoıý jónindegi Ahýaldyq ortalyq; +77015282837 – stýdenttik jataqhana qurylysy boıynsha jobalyq keńseniń basshysy Damır Kýtýmov.