Almatyda «Jasyl el» jasaqtarynyń eńbek maýsymynyń jabylý saltanaty ótti, dep habarlaıdy aqshamnews.kz
Bıylǵy maýsymnyń qorytyndysy boıynsha 2100 jas ýaqytsha jumyspen qamtylyp, qala aýmaǵynda ártúrli ekologıalyq sharalarǵa qatysty. Joba Almaty qalasy Jastar saıasaty basqarmasynyń qoldaýymen júzege asty.
«Prezıdentimiz Qasym-Jomart Toqaevtyń bastamasymen elimizde «Taza Qazaqstan» jalpyulttyq aksıasy ótýde. Osy aksıa aıasynda «Jasyl el 2024» eńbek jasaqtary óz jumysyn abyroımen atqardy dep aıta alamyz. Joba aıasynda Almaty qalasynyń JOO men kolejderiniń 2100 stýdentin ýaqytsha jumyspen qamtydyq. Kelesi jyly budan da kóp jasty jumyspen qamtımyz degen oıdamyz. Aıta keteıin, Almaty jastary jyl boıy qalamyzdy kórkeıtýge baǵyttalǵan túrli eko-sharalarǵa qatysady jáne jyl saıyn olardyń sany ósip keledi», - dedi óz sózinde Almaty qalasy Jastar saıasaty basqarmasynyń basshysy Azız Kajdenbek.
«Jasyl el» jasaqtary 3 aı boıy Almatynyń barlyq aýdandarynda tazalyq jumystaryn júrgizdi. Olar kósheler men saıabaqtardy tazalap, aǵashtar otyrǵyzyp, tabıǵatty qorǵaý sharalaryna belsene aralasty. Uıymdastyrýshylardyń aıtýynsha, mundaı sharalar tek qala tabıǵatyn jaqsartýǵa ǵana emes, sonymen qatar jas býynnyń ekologıalyq jaýapkershiligin arttyrýǵa múmkindik beredi.
Shara barysynda maýsymda úzdik dep tanylǵan 20 stýdentke Smart teledıdarlar men elektr samokattar syıǵa tartyldy.
Saltanatty jıyn estrada juldyzdarynyń qatysýymen konserttik baǵdarlamamen jalǵasty.