Búgingi tańda tótenshe jaǵdaılar, sonyń ishinde tabıǵı apattar qaýpi – qoǵamdy alańdatyp otyrǵan basty máselelerdiń biri.
Osy oraıda Almaty qalasy Jastar saıasaty basqarmasy men Tótenshe jaǵdaılar departamenti birlesip, qalamyzdaǵy joǵary oqý oryndarynyń profesorlyq-oqytýshylyq quramy men stýdentterin seısmıkalyq qaýipsizdik týraly aqparattandyrý jumystaryn bastady, dep habarlaıdy Almaty-akshamy.kz
Logıstıka jáne kólik Akademıasynda TJD Azamattyq qorǵanys basqarmasynyń aǵa ofıseri, maıor Sandýǵash Baımuhambetovamen ótken kezdesýde tótenshe jaǵdaılardaǵy qaýipsizdik sharalary pysyqtaldy. Sandýǵash Amantaıqyzy almatylyqtar tap bolýy múmkin barlyq tótenshe jaǵdaılar týraly tolyq paıdaly aqparat berdi.
– Tótenshe jaǵdaılar, tabıǵı apattar qoǵamdaǵy ár azamattyń ómirine jáne onyń materıaldyq shyǵyndaryna ákep soǵady. Azamattardyń qaýipsizdigin saqtaý úshin azamattyq qorǵaý qyzmetteriniń daıyndyqta bolýyn talap etedi. Soǵan oraı, azamattarymyz, sonyń ishinde jastarymyz ózin-ózi qorǵaı alatyndaı tótenshe jaǵdaıǵa daıyn bolýyn qamtamasyz etýimiz kerek. Sondyqtan osyndaı aqparattandyrý sharalarynyń ótýi óte mańyzdy , - deıdi TJD ókili Sandýǵash Amantaıqyzy.
Sondaı-aq, is-sharada tabıǵı apat nemese adamdardyń qateliginen bolatyn órttiń betin qaıtarýǵa daıyndyq, alǵashqy medısınalyq jáne psıhologıalyq kómek kórsetý boıynsha máseleler túsindirildi. Aqparattandyrý jumystarynyń alǵashqy kúnderi qalamyzdyń 20 JOO-nan 1000-ǵa jýyq adam qatysty. Qalǵan oqý oryndarynda atalmysh shara 5 naýryzǵa deıin jalǵasyp, jalpy 2000-ǵa jýyq adam qatysady dep josparlanýda.
Almaty qalasy Jastar saıasaty basqarmasy qala jastaryna jer silkinisi kezindegi erejeler men alǵashqy kómek boıynsha aqparatty sıfrlandyrýdy josparlap otyr. Bul týraly basqarma basshysy Qaıyrjan Meńdiǵalıev aıtty.
– Biz Almaty qalasynyń Tótenshe jaǵdaılar departamentimen birlesip, qala turǵyndaryn seısmıkalyq qaýipsizdik týraly aqparattandyrý jumystaryn jeńildetý úshin, jer silkinisi kezindegi erejeler men alǵashqy kómek boıynsha arnaıy bilim berý baǵdarlamasyn sıfrlandyryp, qysqa merzimdi kýrs arqyly jasalmaty.kz aqparattyq portalyna ornalastyrýdy josparlap otyrmyz. Jastardy keńinen aqparattandyrý úshin onlaın kýrsty iske qosatyn bolamyz. Sebebi árbir jas almatylyq jer silkinisi kezindegi alǵashqy qadamdy bilý qajet, - dedi óz sózinde Jastar saıasaty basqarmasynyń basshysy Qaıyrjan Meńdiǵalıev.
Sonymen qatar, aldaǵy ýaqytta qalamyzdaǵy 8 komúnıtı ortalyǵynda jastarǵa qaýipsizdik sharalaryn túsindirý jumystary boıynsha birqatar is-sharalar uıymdastyrylatyn bolady.