Almatyda jastar saıasaty basqarmasynyń qoldaýymen iske asyrylyp jatqan «Jastarǵa arnalǵan jalpyqalalyq mansap kúnderi» aýqymdy jobasy bastaldy, dep habarlaıdy aqshamnews.kz.
Bastamanyń maqsaty - jas mamandarǵa jumys tabýǵa, kásibı daǵdylaryn damytýǵa jáne áleýetti jumys berýshilermen baılanys ornatýǵa kómektesý. Bul týraly óńirlik komýnıkasıalar qyzmetiniń baspasóz konferensıasynda qalalyq mansap ortalyǵynyń jumys berýshilermen jáne áriptestermen jumys bóliminiń basshysy Aqarys Tórebekov habarlady.
«Qazaqstan halqynyń 27%-yn jastar quraıdy – bul 5,3 mıllıon adam. Jyl saıyn eńbek naryǵyna 250 myńǵa jýyq jas maman shyǵady, alaıda olardyń barlyǵy birden óz mamandyǵy boıynsha jumys taba bermeıdi. Biz bul jaǵdaıdy ózgertkimiz keledi», – dedi spıker.
Onyń aıtýynsha, alǵashqy bos oryndar jármeńkesi 31 naýryzda Almaly aýdanynda, Almaty tehnologıalyq ýnıversıtetiniń bazasynda ótti. İs-sharaǵa 50-den astam jumys berýshi men 500-den asa jumys izdeýshi qatysty.
«Biz jastarǵa jumys tabýmen qatar, óz daǵdylaryn damytýǵa, naryq talaptaryn túsinýge jáne motıvasıa alýǵa múmkindik beretin biryńǵaı alań quryp jatyrmyz», – dep atap ótti Aqarys Tórebekov.
Ol jaqyn arada joba qalanyń barlyq aýdandaryn qamtıtynyn aıtty. 14 sáýirde bos oryndar jármeńkesi Medeý aýdanynda Qazaq Ulttyq Agrarlyq Zertteý Ýnıversıtetiniń bazasynda, al 24 sáýirde Bostandyq aýdanynda Satbayev University bazasynda ótedi. Kóktemniń sońyna deıin taǵy bes, al kúzde úsh is-shara ótedi.
Uıymdastyrýshylar 8 myńnan astam jastardy qamtýdy jáne keminde 500 adamdy jumysqa ornalastyrýǵa járdemdesýdi josparlap otyr. Jármeńkelerden basqa, kásiporyndarǵa ekskýrsıalar jáne BAQ pen áleýmettik jelilerde belsendi aqparattyq qoldaý qarastyrylǵan.
«Jalpyqalalyq mansap kúnderi» jobasy jastar arasyndaǵy jumyssyzdyqty tómendetýdegi mańyzdy qadam bolady jáne almatylyq jastar arasynda kásibı damýǵa turaqty yntalandyrýdy qalyptastyrýǵa kómektesedi», - dep qortyndylady spıker.