Qazaqstan Respýblıkasy Densaýlyq saqtaý vıse-mınıstri Erlan Nurlybaev azamattardyń medısınalyq kómekke qatysty ótinishterin tyńdady. Pavlodar oblysynyń zeınetkeri ókpeniń sozylmaly aýrýyna baılanysty Almaty nemese Astana qalasyna tekserýge jáne emdelýge jiberýge qoldaý kórsetýdi surady. 3-toptaǵy múgedektigi bar balanyń anasy Qazaqstanda arnaıy ońaltý ortalyqtarynyń joqtyǵyn aıtyp, Máskeýde emdelýge kómek kórsetýdi ótindi.
Sondaı-aq baýyr transplantasıasyn qajet etetin onkologıalyq naýqas balanyń anasy shetelde em alý máselesin kóterdi. Astana turǵyny 2008 jyly alǵan farmasevt-provızor biliktiligin rastaý máselesin qozǵady, sebebi tıisti qujatsyz jumysqa turý múmkin emes. Sonymen qatar ýaqytsha jumyssyz azamattar úshin mindetti áleýmettik medısınalyq saqtandyrý (MÁMS) talaptaryn qaıta qaraý, psıhıkalyq aýrýlardy dıagnostıkalaýdy kúsheıtý, medısınalyq mekemelerdiń jumysyna qatysty shaǵymdar kóterildi. Erlan Nurlybaev barlyq máseleler jan-jaqty qaralyp, Densaýlyq saqtaý mınıstrligi olardyń sheshimin tabýǵa barynsha kúsh salatynyn málimdedi.
QR Qarjy naryǵyn retteý jáne damytý agenttigi tóraǵasynyń birinshi orynbasary Nurlan Abdrahmanov azamattardyń qarjylyq qıyndyqtaryn sheshýge qatysty ótinishterin qabyldady. Astana turǵyny alaıaqtyq jolmen óz atyna nesıe rásimdelgenin aıtyp, máseleni sheshýge kómek surady. Atyraý turǵyny «Damý» baǵdarlamasy aıasynda bıznesin damytý úshin 170 mln teńge nesıe alǵanyn aıtyp, bir jylǵa keıinge shegerýdi ótindi. Taraz qalasynyń turǵyny nesıeleri men mıkrokredıtterin qaıta qarjylandyrý boıynsha kómek surady. Sonymen qatar, azamattar bank qyzmetterine qatysty shaǵymdaryn jetkizdi. Nurlan Abdrahmanov agenttik barlyq ótinishterdi muqıat zerttep, qoldanystaǵy zańnama aıasynda kómek kórsetetinin, al bank zańsyz áreketterge jol berse, tıisti sharalar qabyldanatynyn aıtty.
Májilis depýtaty, «AMANAT» partıasy fraksıasynyń múshesi Tilektes Adambekov kásipkerlikti qoldaý jáne áleýmettik kómek máseleleri boıynsha azamattardy qabyldady. Kezdesý barysynda materıaldyq kómek kórsetý, sot sheshimderimen kelispeý, dárigerler jumysyna shaǵymdar talqylandy. Qaraǵandy oblysynyń kásipkeri shaǵyn jáne orta bıznesti qoldaý máselesin kóterdi. Semeı turǵyny serebraldy sal aýrýymen (DSP) aýyratyn balasyn emdeýge qatysty suraq qoıdy. Almatydan kelgen kásipker mektepterdegi kitap qorlaryn damytý boıynsha bastama kóterdi. Aqmola oblysynyń turǵyny sý tasqyny saldarynan baspanasy búlingennen keıin tıisti kómekti ala almaǵanyn jetkizdi.
«Atameken» QR Ulttyq kásipkerler palatasy basqarma múshesi – basqarma tóraǵasynyń orynbasary Tımýr Naqypbekov kásipkerlerdi qoldaý máseleleri boıynsha ótinishterdi tyńdady. Almaty turǵyny shaǵyn bıznesti qoldaý sharalary týraly surady. Aqtóbe turǵyny jergilikti atqarýshy organdar men kásipkerler arasyndaǵy ózara is-qımyldy jaqsartý boıynsha kómek kórsetýdi ótindi. Qaraǵandy oblysynyń jas kásipkeri tehnıkalyq mamandyqtar boıynsha jastardy daıarlaıtyn bilim berý fılıalyn ashý bastamasyn usyndy. Sondaı-aq, ulttyq kıim tigýmen aınalysatyn kópbalaly ana qoldaý surady.
Tımýr Naqypbekov barlyq ótinishter tıisti qurylymdarmen birlesip qarastyrylatynyn, al «Atameken» kásipkerlerdiń bastamalaryn barlyq deńgeıde qoldaıtynyn aıtty.
«AMANAT» partıasynyń qoǵamdyq qabyldaýlary óz jumysyn jalǵastyryp, azamattarǵa túrli máseleler boıynsha kómek kórsetedi.
Eske sala keteıik, óz suraqtaryńyz boıynsha «AMANAT» partıasynyń Respýblıkalyq qoǵamdyq qabyldaýyna kelesi baılanys arnalary arqyly júgine alasyz:
1. Call-ortalyq: 8 800 080 4441(Qazaqstan boıynsha qońyraý shalý tegin);
2. WhatsApp: 8 700 800 4441
3. E-mail: komek@amanatpartiasy.kz
Qabyldaýǵa jazylý kezdesýge deıin keminde 3 kún buryn júzege asyrylady.