Jetisý aýdanynyń ákimi Lázzat Jylqybaeva óńirlik komýnıkasıalar qyzmetinde ótken baspasóz konferensıasynda jastardyń jan-jaqty damýyna yqpal etetin – aýdan aýmaǵyndaǵy alǵashqy ınovasıalyq shyǵarmashylyq ortalyqtyń qurylysyn tanystyrdy.
Ákimniń aıtýynsha, Aınabýlak-2 shaǵyn aýdanynda salynatyn jańa ortalyq jasóspirimder men jastardyń kreatıvti ári tehnologıalyq daǵdylaryn damytýǵa arnalǵan alańǵa aınalady. Ortalyqtyń qurylysyn 2026 jyldyń sońynda aıaqtamaq.
«Bul ortalyq balalar men jasóspirimderdiń shyǵarmashylyq áleýetin damytýǵa baǵyttalady. Sonymen qatar, jastardyń ónerden bastap tehnologıaǵa deıingi túrli saladaǵy ıdeıalaryn júzege asyrýyna arnalǵan keńistik bolady. Bul tek bilim berý ortalyǵy emes, sonymen qatar mádenı alań bolady dep oılaımyz», – dep atap ótti Lázzat Jylqybaeva.
Ortalyq 2 gektar jerde ornalasady. Bul jer memlekettik qordyń balansynda jáne turǵyndardyń ótinishi boıynsha tańdalǵan. Memlekettik saraptamadan ótkennen keıin qurylys jumystary 2025 jyldyń IV toqsanynda bastalady.
Inovasıalyq shyǵarmashylyq ortalyqta mynadaı nysandar bar:
- óner baǵytyndaǵy stýdıalar,
- jańa tehnologıalarmen jumys isteýge arnalǵan zerthanalar,
- kórme men shyǵarmashylyq keńistikter,
- sheberlik saǵattary, dárister men mádenı sharalar.
Lázzat Jylqybaeva jobanyń júzege asyrylýy – aýdandaǵy kreatıvti ındýstrıa men jastar ortasyn damytýǵa qosylǵan mańyzdy úles ekenin atap ótti.
«Bul – bilim sapasyn arttyryp, jastarymyzǵa ózin damytýyna múmkindik beretin mańyzdy qadam», – dedi ol.