Premer-mınıstr Oljas Bektenov qurylys salasynyń qyzmetkerlerine Memleket basshysynyń atynan marapattar tabys etti, - dep habarlaıdy Aqshamnews.kz.
Qurylysshy kúni qarsańynda Premer-mınıstr Oljas Bektenov Memleket basshysy Qasym-Jomart Toqaevtyń atynan sala mamandary men ardagerlerin kásibı merekelerimen quttyqtap, memlekettik nagradalar tabys etti.
2025 jyly Jumysshy mamandyqtary jyly aıasynda Prezıdent tapsyrmasyna sáıkes, memlekettik nagradalar júıesine alǵash ret «Qazaqstannyń eńbek sińirgen qurylysshysy» qurmetti ataǵy engizildi.
«Memleket basshysy adamı kapıtaldy damytýǵa erekshe kóńil bólip otyr. Prezıdent jarıalaǵan Jumysshy mamandyqtary jyly eńbek adamynyń bedelin arttyrýdy kózdeıdi. Memleket basshysy adal ári tabandy eńbegimen tabysqa jetken adamdar qashanda qurmetti, syıly bolýy kerek ekenin atap kórsetti. Bul – sizderdiń eńbekterińizdi memlekettik deńgeıde baǵalaý men naqty qoldaýdyń shynaıy kórinisi.
Úkimet tarapynan aldaǵy ýaqytta da otandyq qurylys salasynyń ınvestısıalyq tartymdylyǵyn arttyrýǵa, qajetti ınfraqurylymdy damytýǵa jáne bıznes úshin qolaıly jaǵdaılar jasaýǵa basymdyq beriledi. Biz jańa tehnologıalardy engizý jáne kásibı standarttardy jetildirýge jaǵdaı jasaýdy jalǵastyramyz», — dep atap ótti Oljas Bektenov.
Sóz barysynda Premer-mınıstr eldiń ekonomıkalyq ósýin qamtamasyz etýdegi qurylys sektorynyń mańyzdylyǵyn atap ótti. Búgingi tańda Qazaqstannyń JİÓ-degi salanyń úlesi 6%-ǵa jetedi. Ótken jyldyń qorytyndysy boıynsha 19 mln m2 astam, onyń ishinde 170 myńnan astam turǵyn úı nysandary paıdalanýǵa berildi. Osy jyldyń birinshi jartyjyldyǵynda – 120-dan astam mektep pen balabaqsha, 30 densaýlyq saqtaý nysany salyndy. Jalpy qurylys jumystarynyń kólemi 2025 jyldyń basynan beri 18%-ǵa ósti.
Prezıdent qoıǵan qurylys úderisterin jańǵyrtý jónindegi mindetterdi oryndaý sheńberinde sıfrlyq sheshimderdi engizý, búrokratıalyq kedergilerdi joıý jáne salanyń kadrlyq áleýetin nyǵaıtý jónindegi ózekti tásilderdi kórsetetin jańa qurylys kodeksi ázirlendi.
Jıynda marapattalǵandardyń atynan qurylys salasynyń ardager Qaısar Omarov pen «SAPITAL GROUP ST» JSHS ınjeneri Baýyrjan Mahan sóz sóıledi. Qurylys sektorynyń qyzmetkerleri Memleket basshysyna olardyń eńbegin joǵary baǵalap, jumysshy mamandyqtaryn damytýǵa kóńil bólgeni úshin alǵys bildirdi.
«Kele jatqan mereke qarsańynda Memleket basshysyna «Qazaqstannyń eńbek sińirgen qurylysshysy» ataǵy qaıtadan memlekettik nagradaǵa aınalǵany úshin zor alǵysymdy bildirgim keledi. Bul bizge, qurylysshylarǵa degen erekshe qurmet»,— dep atap ótti qurylys salasynyń ardageri Qaısar Omarov.
«Búginde qurylys salasyn damytý — Memleket basshysy belgilegen basymdyqtardyń biri. Prezıdenttiń qoldaýynyń arqasynda sońǵy jyldary turǵyn úı qurylysy, sondaı-aq óndiristik jáne áleýmettik nysandardyń qurylysy qarqyndy damyp keledi. Kórsetkishterdiń artynda tek statısıka ǵana emes, árbir kirpishke salynǵan orasan zor eńbek tur», — dep tolyqtyrdy «SAPITAL GROUP ST» JSHS ınjeneri Baýyrjan Mahan.
Qurylys salasyn damytýǵa qosqan úlesi úshin Oljas Bektenov úzdik qyzmetkerlerge Prezıdent atynan marapattar tabys etti.