2025 jyl Jumysshy mamandyqtary jylynyń aıasynda Qazaqstan Respýblıkasy Oqý-aǵartý mınıstrliginiń, Qazaqstan Respýblıkasy týrızm jáne sport mınıstrliginiń, Almaty qalasy Bilim basqarmasynyń qoldaýymen Halyqaralyq qazaq-qytaı til kolejiniń uıymdastyrýymen kolej stýdentteri arasynda «Týrızm» mamandyǵy boıynsha «Jas týrıs» VII Halyqaralyq etno-eko ekskýrsıalyq-sporttyq týrısik saıysy óz jumysyn aıaqtady.
Eki kún boıy Almaty, Astana, Aqtaý, Baıqońyr, Túrkistan, Tekeli qalalary men Qyrǵyzstan, Ózbekstan, Tájikstan elderinen kelgen «Týrızm» mamandyǵynyń kolej stýdentteri týrısik jabdyqtardy paıdalanyp, kedergilerden ótti. Saıys Býtakovka shatqalynda, «Lesnıchestvo» oqý-jattyǵý bazasynda ótti, dep habarlaıdy aqshamnews.kz.
Saıys qorytyndysy boıynsha Tekeli kásiptik koleji komandasy 1 oryn, Halyqaralyq qazaq-qytaı til koleji komandasy 2-oryn, Astana polıtehnıkalyq koleji komandasy 3-oryn ıelendi.
Saıys qorytyndysy boıynsha jeńimpazdar men qatysýshylar, sondaı-aq komandalar jetekshileri dıplomdarmen, sertıfıkattarmen jáne baǵaly syılyqtarmen marapattaldy.
Sharanyń negizgi maqsaty – ishki týrızmdi damytý, qorshaǵan ortaǵa uqypty qaraý, jastardyń densaýlyǵyn nyǵaıtý, rýhanı jáne tabıǵı jetilýin qamtamasyz etý.
Saıys Qazaqstannyń halyqaralyq deńgeıde tanymaldylyǵyn arttyrý, kiris týrızmin damytý, etnotýrızm men salaýatty ómir saltyn nasıhattaý, sondaı-aq týrısik-ólketaný qyzmetin uıymdastyrýdaǵy ozyq tájirıbeni anyqtaý jáne taratý maqsatynda ótkizildi.