Búgin 28 gvardıashy-panfılovshylar saıabaǵynda Otan aldyndaǵy boryshyn óteýge attanǵan jas sarbazdardy shyǵaryp salý rásimi ótti. Bul joly 30 almatylyq jas Qazaqstan Respýblıkasy Qarýly kúshteriniń 38-desanttyq-shabýyldaý brıgadasynda áskerı mindetin óteıdi.
Shara el patrıotızmin ulyqtap, rýhty kótergen áserli kóriniske aınaldy. Áskerı orkestr áýeni, ardagerlerdiń batasy men ata-analardyń aq tileýi jas sarbazdardyń boıyna erekshe kúsh-qýat syılady.
Armıa – ómir mektebi
Desanttyq-shabýyldaý áskerleri qolbasshysynyń tárbıe jáne ıdeologıalyq jumystary jónindegi orynbasary, polkovnık Radjan Janysov ata-analarǵa balalarynyń senimdi qolda ekenin jetkizdi.
"Armıa – úlken ómir mektebi. Bir jyl ishinde olardyń kózqarasy keńeıip, ómirge degen jaýapkershiligi artady. Kóptegen sarbazdar áskerı mamandyq alyp, keıin kelisimshartpen qalýǵa nemese joǵary oqý oryndaryna túsýge múmkindik alady. Biz ata-analarǵa «uldaryńyzdy bir jylǵa bizge tárbıeleýge berińizder, olar azamat bolyp qaıtady» degimiz keledi", – dedi ol.
Polkovnıktiń aıtýynsha, bıyl desanttyq-shabýyldaý bólimderine keletin sarbazdardyń qatary artqan. Tek Almatynyń ózinen 340 jas jaýynger osy brıgadaǵa jiberiledi.
Ata-áje batasy, analyq tilek
Jas sarbazdardy shyǵaryp salýǵa ardagerlermen birge ata-analar men týystar da qatysty. Solardyń biri — almatylyq áje Tolǵanaı Jákeeva.
"Jalǵyz qyzymnyń bir túıir balasy, nemerem, esimi - Jan. Óz erkimen áskerge barǵaly tur. Barlyq nemerelerim áskerde bolǵan, endi eń kishisi sapqa qosyldy. Aq jol tileımin, aman-esen oralyp, azamat bolyp kelsin", – dedi ol tebirenip.
Al 18 jastaǵy Jan Tarybaev bolsa, áskerge barýdy óz sheshimimen qabyldaǵanyn aıtty.
"Bul – ár jigittiń paryzy. Óz erkimmen, óz sheshimimmen bara jatyrmyn. Jaqsy dostar tabamyn dep oılaımyn", – deıdi ol.
Tarıhı rýh pen batyrlar izimen
Ortalyq Armıa úıi áskerı-tarıhı mýzeıiniń dırektory, Keńes Odaǵynyń Batyry general-maıor Ivan Panfılovtyń nemeresi, QR eńbek sińirgen qaıratkeri Alýa Baıqadamova jas sarbazdarǵa patrıottyq rýhta ún qatty.
"Bul jer – batyrlardyń izi qalǵan qasıetti oryn. Panfılovshylar dál osy jerden maıdanǵa attanǵan. Sizderdiń búgingi qadamdaryńyz – sol erlik dástúriniń jalǵasy. Armıa sizderdi shyńdap, elge adal qyzmet etýdiń mánin uǵyndyrady", – dedi ol.
Áskerge barý – mártebe
Almaty qalalyq Qorǵanys isteri jónindegi departamenti bastyǵynyń orynbasary Nurjan Estaev ta bıylǵy kúzgi áskerge shaqyrý naýqanynyń ereksheligin atap ótti.
"Búgin Almatydan 30 shaqyrylýshy attandy. Olardyń bári densaýlyǵy myqty, psıhologıalyq turǵyda turaqty jastar. Áskerde bir jyl boıy jaýyngerlik daıarlyqtyń barlyq túrin meńgeredi. Jaqsy nátıje kórsetken sarbazdarǵa tegin grantpen joǵary oqý oryndaryna túsý múmkindigi beriledi", – dedi ol.
Shara sońynda jınalǵan jurt jas sarbazdarǵa aq batasyn berip, estelikke sýretke tústi. Bul sát jastardyń el amandyǵy úshin qyzmet etý – eń úlken abyroı ekenin sezingen sát edi.
İs-shara sońynda 38-desanttyq-shabýyldaý brıgadasynyń taýlyq rotasy qoıan-qoltyq urystyń kórinisin kórsetip, konserttik baǵdarlama usyndy.
Kórsetilim barysynda áskerılerdiń kásibı sheberligi men dene daıyndyǵy aıqyn kórindi. Al merekelik konsert qatysýshylarǵa kóterińki kóńil-kúı syılady.