Almatydan bírneshe shaqyrym jerde 86 jastaǵy Sadu ata tūrady. Ony qarapaıym auyl qarıyasy deseńíz qatelesesíz: ol - álemdegí Counter-Strike oınaıtyn eń qart adam. Sebebí eń tanymal qart kıbersportshy Abbe Drakborg búgínde 82 jasta. Úsh jyl būryn Sadu ataǵa Parkınson dıagnozy qoıylǵan. Bíraq ol moıymaıdy, kerísínshe, onymen kúrestíń jolyn tapqan. Aqshamnews.kz tílshílerí qarıyanyń shańyraǵyna baryp, sūhbattasyp qaıtty.
TikTok-ta Sadu atany kópshílík jaqsy tanıdy. Kúlgín tústí taqıyasy - onyń aıryqsha belgísí. Tańerteń saǵat 10 men 12 aralyǵynda ol kompyuterín qosyp, ekí saǵattaı "atysyp" alady. Būl uaqytta ol tíkeleı efırge shyǵady. Al bar-joǵy alty aıdyń íshínde onyń TikTok-taǵy oqyrman 17 myńnan asyp ketken.
Sadu atanyń aıtuynsha, oıyn - jaı ermek emes, Parkınsonǵa qarsy terapıyanyń túrí. Kompyuter oıyny onyń oı-qımylyn sergítíp, sausaq motorıkasyn jattyqtyrady.
Atanyń bólmesí - geımerlerdíń armany. "Jūmys orny" tolyq jabdyqtalǵan: mūnda quatty protsessor, ekí monıtor (onyń bírí strımge arnalǵan), sapaly veb-kamera, qolǵa yńǵaıly pernetaqta men tíntuír, sondaı-aq, kásíbı qūlaqqaby bar.
Onyń aıtuynsha, būl jabdyqty ortanshy ūly Erdos ápergen. 2022 jyly dárígerler Sadu ataǵa Parkınson dıagnozyn qoıǵan. Qarıyanyń aıtuynsha, auru tańǵa taman qozady.
"Myna oıynnyń arqasynda keıde Parkınson baryn ūmytyp ketemín. Negízí tańǵa jaqyn tremor bastalady, sosyn júrgende sol qolym díríldep ketedí. Mūndaı kezde bír qolymdy ekínshísíníń ústíne qoıyp, moıyn tūsyma nemese íshíme qoısam báseńdeıdí. Jalpy adam báríne beıímdeledí, sheshu jolyn ízdeıdí eken", - deıdí ol.
Bír qyzyǵy, Sadu atanyń ūly Erdoc Counter-Strike oıynyn onsha meńgermegen. Bíraq ol ákesíníń geımerge aınaluyna sebep bolǵan. Erdoc ınternetten Parkınson dıagnozy bar adamdarǵa kompyuter oıyndary motorıka men mı belsendílígín jaqsartuǵa kómektesedí degen zertteudí oqyp, būl tásíldí ákesíne ūsynǵan. Al oıyn jabdyǵyn jınauǵa 350 myń teńgedeı jūmsalǵanyn aıtty.
"Tolyq úırendím deı almaımyn, keıde "perezaryad" jasaudy ūmytyp ketem, bíraq kún óte jaqsaryp kelemín. TikTok-taǵy kommentterdí oqyp otyrsań, eríksíz kúlkíń keledí. Oıyn aty oıyn ǵoı, bala bolsyn, ata bolsyn, jeńseń - quanasyń. Bíraq men úshín būl - tek kóńíl kóteru emes, úlken tájírıbe. Kóp nárse úırendím, daǵdym qalyptasty. Alǵashynda qıyn edí, keıde qate batyrmany basyp qoyatynmyn. Óıtkení mūnda mı, kóz, qol - bárí bír uaqytta jūmys ísteuí kerek. Sol arqyly ózímdí jattyqtyramyn", - deıdí ol.
Sadu ata típtí ózíne tanys qarsylastardy da atap óttí.
"Baba Olya degen oıynshy bar. Ol menen on jas kíshí, qatelespesem, Reseıde tūrady. Onymen álí oınap kórmedím", - dep jymıyp ol.
TikTok-taǵy "Sadu ata" fenomení
Sadu atanyń TikTok-ta 18 myńǵa juyq oqyrmany bar. Ol kúnde tíkeleı efırge shyǵyp, oıyn sátterín bólísedí. Efırge bírden 150-den asa adam qosylady. Bírí atanyń oıynyna qyzyǵyp jatsa, endí bírí ony motıvatsıya deıdí.
Sadu atanyń qyzyqqa toly ómírí
Sadu Sadyqūly Saparǵalıev 1939 jyly 24 nauryzda dúnıege keldí. Qarıya ómírín "ekí kezeńge" bóledí.
"2018 jyly júregíme ota jasalyp, shunt qoıyldy. Sol kún - meníń ekínshí tuǵan kúním. Jasandy júrekpen júrgeníme jetí jyl boldy. Dárígerlerge myń alǵys!" - deıdí ol.
Ómíríníń 52 jylyn eńbekke arnaǵan qarıyanyń kásíbí - energetıka. 1957 jyly mektep bítíre salysymen jūmysqa kírísken ol 1969 jyly Pavlodar ındustrıyaldy ınstıtutyn támamdap, ınjener-elektrık bolyp Taldyqorǵanda qyzmet etken.
"40 jyldan asa uaqyt Energetıka mınıstrlígínde eńbek ettím, 13 jyl basshylyqta boldym. Marapatsyz da emes - "Eren eńbegí úshín", "Eren eńbegí úshín", "TMD ardagerí" syndy medaldaryn aldym", - deıdí ata.
Sadu Sadyqūly kezínde Reseıde taǵylymdamadan ótíp, Temírtaudaǵy domna tsehínde de jūmys ístegen.
"Sol kezde Nazarbaev pen Súleımenov te sonda edí. Energetıka - men úshín tylsym dúnıe. 18 jastan energetık boludy armandadym", - dep eske alady ol.
Sūhbat barysynda Sadu ata bízge kóne suretterín kórsettí. Olardyń arasynda Domna tsehí ashylǵan sátte ózí túsírgen fotolar da bar eken.
"Ómírímníń eń auyry kezí - jūbaıymdy joǵaltqan sát"
Sadu ata 1968 jyly úılengen. Úsh ūly bar. Qazír ortanshy ūly Erdostyń qolynda tūrady.
"Ómírímníń eń auyr kezeńí - 2012 jyl. Sol jyly jūbaıymnan aıyryldym. 40 jyl Taldyqorǵanda tūrdyq, keıín Bírlík auylyna kóshtík. Taǵdyr solaı boldy", - deıdí qarıya.
"Bos otyrmaımyn - júzím ósíremín, shahmat oınaımyn"
Oıynnan tys uaqytta zeınetker bau-baqshasyn kútedí. Júzím ósíredí, shahmat oınaıdy, kítap oqıdy.
"Kórshí balamen shahmat oınaımyz. Dalada aǵash jaramyn, pesh jaǵamyn. Otyruǵa bolmaıdy. Adam báríne beıímdeledí, tek tyrysu kerek", - deıdí ol baıyppen.
"Energıyany qaıdan alasyz?" degen sūraqqa Sadu ata kúlíp:
"Túste jaqsylap demalamyn, keshke erte jatamyn. Míne, meníń qūpıyam osy!"- dep jauap berdí.
"Ómírde jeńílmeu kerek"
Rasymen, Sadu ata - jeńímpaz. Típtí taǵdyrdyń eń kúrdelí synaǵyn jeńíl árí qūshtarlyqpen qabyldaıdy. Qarıya jastarǵa bata retínde ómírlík keńesín de aıtty.
"Ómír súru ońaı emes. Eń bastysy - ózíńe maqsat qoıyp, soǵan ūmtylu. Alǵa qoıǵan maqsattaryma jettím dep aıta alamyn. Qazaqta "aǵash otyrǵyzu kerek, bala ósíru kerek, úı salu kerek" deıdí ǵoı, sonyń bárín oryndadym. Adam ómíríńníń ayaǵynda "uaqytty qalaı ótkízdím?" degen oı tuady. Sol kezde júregíń tynysh, kóńílíń rıza boluǵa tıís", - dep túıíndedí Sadu ata.
Aıta keteıík, sheteldík dárígerler Parkınson auruynyń damu qarqynyn bayaulatatyn kompyuterlík oıyndardy synaqtan ótkízgen edí.