«Nur Otan partıasynyń Almaty qalalyq fılıalynda «Jas Órken» respýblıkalyq balalar syılyǵynyń jeńimpazdary marapattaldy. Baıqaýǵa Qazaqstannyń barlyq óńirlerinen 400-den asa daryndy balalar qatysyp, 30-ǵa jýyǵy júldeli oryn ıegeri atandy. Bes nomınasıa boıynsha almatylyq alty óren jeńiske jetti dep habarlaıdy Almaty-akshamy.kz
Marapattaýǵa Qazaqstannyń Eńbek Eri, QR eńbek sińirgen muǵalimi Aıagúl Mırazova, «Nur Otan» partıasy Almaty qalalyq fılıaly tóraǵasynyń orynbasary Qaırat Bısembaev jáne Almaty qalasy máslıhatynyń depýtaty Eraly Saýranbaev qatysty.
Baıqaý qorytyndysy boıynsha Almaty qalasy boıynsha «Jas tolaǵaı» nomınasıasynda Elnaz Qalıahmet, «Jas ekolog» nomınasıasynda Innokentıı Treskýnov, al «Jas sýretshi» nomınasıasynda Angılıkı Popondopýlo jeńimpaz atandy. «Jas zertteýshi» nomınasıasynyń laýreaty Anel Tokına, «Kórkemsóz sheberi» nomınasıasynyń laýreaty Toǵjan Abaı, «Jas ekolog» nomınasıasynda Maǵjan Erǵanat laýreaty atandy.
«Shynymdy aıtsam, men jeńimpazdar tiziminde bolamyn dep kútken joqpyn. Bala kezimnen maǵan oqýǵa degen súıispenshilik sezimdi uıalatqany úshin otbasyma sheksiz rızamyn. Uıymdastyrýshylar men partıaǵa qoldaý kórsetkenderińiz úshin raqmet. Men mindetti túrde kelesi jyly da baıqaýǵa qatysamyn», - dedi kórkemsóz sheberi Toǵjan Abaı.
Sonymen qatar, respýblıkalyq baıqaýdyń jeńimpazdary men júldegerlerin Almaty qalalyq máslıhatyndaǵy «Nur Otan» fraksıasynyń músheleri Eraly Saýranbaev pen Nurymbek Taý qoldady. Depýtattar almatylyq oqýshylarǵa planshetter men uıaly telefondardy tabys etti.
«Daryndy jáne zerek balalar – Táýelsiz elimizdiń bolashaǵy. Men baıqaýdyń barlyq jeńimpazdary men qatysýshylaryn shyn júrekten quttyqtaımyn. Alǵyr balalarymyzdyń qatarynyń basym bóligi bizdiń megapolıstiń oqýshylary bolǵandyǵy qýantady. Biz talantty ári kreatıvti balalarǵa árdaıym qoldaý kórsetýge daıynbyz», - dep atap ótti Aıagúl Tóreqyzy.
Esterińizge salsaq, «Jas Órken» respýblıkalyq syılyǵy balalar men balalar uıymdaryna beriledi. Syılyqtyń negizgi maqsaty – balalar shyǵarmashylyǵyn damytýǵa baǵyttalǵan daryndy balalar men áleýmettik bastamalardy qoldaý.