Almatyda «Jas Camp» jastar lageri jumysyn bastady. Joba Almaty qalasy Jastar saıasaty basqarmasynyń qoldaýymen júzege asyrylýda. Bıyl atalmysh jobaǵa 100 qatysýshy iriktelip alynǵan. Olardyń qatarynda stýdentter, komúnıtı-ortalyqtardyń rezıdentteri, volonterler, jastardyń ekologıalyq qozǵalystarynyń ókilderi jáne NEET sanatyndaǵy jastar bar.
Olar 5 kúni boıy kóshbasshylyq daǵdylaryn damytyp, áleýmettik jobalar jasaýdy úırenedi.
Lager baǵdarlamasynda trenıńter, master-klasstar, fasılıtasıalyq sesıalar, vorkshoptar men mádenı is-sharalar ótedi dep josparlanǵan. Mentorlar men sarapshylardyń qatarynda Asqat Abjanov, Kamılla Ákimbekova, Janel Sarıeva, Dana Shaıahmet jáne basqalar bar.
«Jas Camp – tek bilim berý alańy ǵana emes, jastar óz sheshimderi men is-áreketteri úshin jaýapkershilikti úırenetin orta bolmaq. Ár kúnniń baǵdarlamasynda komandalyq ózara árekettestikti damytýǵa arnalǵan jattyǵýlar, qoǵamdaǵy jeke rólin túsiný tájirıbeleri, sondaı-aq qalanyń qundylyqtary men bolashaǵy týraly pikirtalastar qarastyrylǵan. Erekshe nazar ekologıalyq mádenıet pen jastardyń damýyna aýdaryldy. Baǵdarlamanyń mańyzdy bóligi – jastarda qorshaǵan ortaǵa uqypty qaraý ádetin qalyptastyrý jáne áleýmettik belsendilikti arttyrý», - dedi Almaty qalasy Jastar saıasaty basqarmasynyń basshysy Azız Kajdenbek.
Uıymdastyrýshylardyń aıtýynsha, munda jeke tulǵalyq ósýge, kóshbasshylyq qasıetterdi nyǵaıtýǵa jáne tek jastardyń ózderine ǵana emes, búkil megapolıstiń bolashaǵyna mańyzdy ıdeıalardy júzege asyrýǵa jaǵdaı jasalýda. Jas qatysýshylar jaýapkershilikti alýdy, strategıalyq oılaýdy jáne ekologıalyq mádenıetti damytýǵa baǵyttalǵan sharalarǵa qatysady.