Olar qamaýǵa alyndy.
Almatyda jappaı tártipsizdikke qatysýshylarǵa armatýra taratqan er adamdar ustaldy, dep habarlaıdy Almaty-akshamy.kz Polisia.kz saıtyna silteme jasap.
Almaty qalalyq PD Ekstremızmge qarsy kúres basqarmasynyń málimetinshe, 20 men 24 jas aralyǵyndaǵy alty er adam ustalǵan.
«5 qańtarǵa qaraǵan túni «Shańyraq» yqshamaýdanyndaǵy úılerdiń birinde bolgarkanyń kómegimen temir armatýranyń bólikterin (70 sm) daıyndap, kelesi kúni jappaı tártipsizdiktiń qatysýshylaryna taratqandyǵy anyqtaldy. Aıtpaqshy, kezdeısoq kýágerler bul is-áreketti uıaly telefonnyń kamerasyna túsirip alǵan. Beınejazbadan adamdardyń GAZel júk shanaǵynan armatýrany «túsirip» jatqanyn kórýge bolady. İs-áreket Tóle bı dańǵylynyń boıynda shyǵys baǵytta oryn aldy. Zańsyz áreketterge qatysýshylar anyqtaldy jáne ustaldy. Olar tártip saqshylardyń densaýlyǵyna zaqym keltirý maqsatynda tártipsizdikke qatysýshylarǵa taratý úshin túni boıy qasaqana temir armatýralar daıyndaǵanyn moıyndady, – dedi Almaty qalalyq polısıa departamenti bastyǵynyń orynbasary Berik Ábilbekov.
Ustalǵandarǵa QR QK-niń 272-baby 2-bóligi boıynsha jappaı tártipsizdikke qatysty degen aıyp taǵylyp otyr. Olar qamaýǵa alyndy.