Qazaq pen japonnyń aýyly alys bolǵanymen kóńili jaqyn. Almatydaǵy Memlekettik Ortalyq mýzeıde ótip jatqan «Japonıa mádenıet kúni» sony kórsetkendeı boldy. Mýzeı qonaqtaryna japon mádenıetin jan-jaqty tanystyratyn shara qazir de Memlekettik Ortalyq mýzeıde ótip jatyr dep habarlaıdy almaty-akshamy.kz.
Tús áletinde bastalǵan mádenı sharaǵa Japonıanyń Qazaqstan Respýblıkasyndaǵy tótenshe jáne ókiletti elshisi Jýn Iamada myrza da arnaıy qatysty. Ol sharanyń ashylý sózinde «Qazaqtar men japondar mádenıet jaǵynan kóp ortaqtyqqa ıe baýyrlar» dep atady.
«Bizdiń syrt kelbetimiz ǵana emes, oı-sanamyz ben mádenıetimizde de kóp uqsastyq bar ekenin bilip tań qaldym, ári tereń áser aldym. Byltyr Japonıa men Qazaqstan dıplomatıalyq baılanys ornatqandarynyń 30 jyldyǵyn birge atap ótti. Japonıada bilim alyp jatqan qazaqstandyqtardyń sany jyldan jylǵa artyp keledi. Bul bizdi qýantady», – dedi elshi myrza.
Sharanyń mańyzy men máni jaıynda Memlekettik Ortalyq mýzeı dırektory Rashıda Harıpova hanym óz pikirimen bólisip, bylaı deıdi: «Bilesizder, ótken aptada QR Mádenıet jáne aqparat mınıstri Aıda Ǵalymqyzy Balaeva Japonıa elshisimen kezdesken bolatyn. Sonda Qazaqsan men Japonıa ortasynda ekonomıkalyq baılanystardy ǵana emes, mádenı qarym-qatynasty da tereńdetý máselelerin kótergen edi. Búgingi shara sol kezdesýdiń júzege asyp jatqan ıdeıasy deýge bolady. Mýzeıimizde japon mádenıeti jan-jaqty tanystyrylyp jatyr. Kórýshilerdiń qatary mol. Sebebi, eki halyqty shekaralar bólip jatqanymen, mádenıet jaǵynda jaqyndyǵymyz aıryqsha».
Ol, sondaı-aq, Memlekettik Ortalyq mýzeı mundaı sharalardy jyl saıyn ótkizip turatynyn, túrli ýaqytta túrli elderdiń mádenıetin tanystyrý sharalary ótetinin de jetkizdi. Qazaqstanda japon mádenıetine qyzyǵýshylyqtyń joǵary deńgeıde ekenin mýzeı zalyndaǵy kórermen sanyna qarap bilýge bolady.
Ataýly mádenı shara aıasynda Memlekettik Ortalyq mýzeı ǵımaratynyń ár buryshynda japon halqynyń taǵam, mádenıet, ulttyq óneri, qolóneri men jaýyngerlik ónerin tanystyrýǵa arnalǵan kórmeler jumys isteýde. Budan bólek japonnyń damyǵan jańa tehnologıalyq jetistikteri, tipti elimizde joǵary satylymǵa ıe avtokólikteri de kórme alańynan oryn alǵan.