Uıymdasqan qylmysqa qarsy kúres basqarmasy Petropavldaǵy saýda jelisiniń basshylyǵynan aqsha bopsalaǵandardy ustady, – dep habarlaıdy almaty-akshamy.kz Polisia.kz. silteme jasap
Saýda jelileriniń biriniń dırektorynyń aryzy boıynsha jedel is-shara júrgizgen SQO PD uıymdasqan qylmysqa qarsy kúres basqarmasynyń qyzmetkerleri jábirlenýshiden 50 mıllıon teńge aqsha bopsalaǵany úshin Petropavldyń eki turǵynyn ustady. 33 jáne 34 jastaǵy eki jas jigit áleýmettik jelilerde tutynýshylardyń quqyqtaryn qorǵaýǵa arnalǵan resýrstardyń avtorlary retinde kópshilik arasynda jaqsy tanys.
2022 jyldyń basynan bastap tutynýshylardyń quqyqtaryn qorǵaýdy uran etken er adamdar Petropavldyń saýda núktelerinde reıdter júrgizip otyrǵan; blogerler retinde saýda jelisi qyzmetkerleriniń qatysýymen arandatýshylyq sıpatyndaǵy beınerolıkter túsirip, polısıa men ózderi arasynda janjaldy jaǵdaılar jasap otyrǵan. Alaıda olar jelidegi aýdıtorıa arasynda zor tanymaldyqqa ıe bolmaǵan; YouTube arnasy men Instagram jelisinde birneshe myń jazylýshysy bar, kópshiligi SQO turǵyndary.
Arandatýshylyq pen janjaldar kezinde merzimi ótken ónimdi satý faktisin jeleý etip júrgen. Alaıda keı jaǵdaılarda — shokolad, sýsyndar sıaqty taýarlardyń aqshasyn tólemeı ózderimen birge alyp ketip otyrǵan. Kúdiktiler reıtdik sharalarymen birge memlekettik organdarǵa saýda oryndarynda anyqtalǵan zań buzýshylyqtar týraly shaǵymdardy jibergen. Osyndaı áreketteri arqyly bıznesti jospardan tys tekserýge sebepshi boldy.
Qyrkúıek aıynyń basynda jastar bopsalaý arqyly saýda jelisiniń óńirlik dırektorynan óz áreketterin toqtatýǵa 50 mln teńge somasynda aqsha talap ete bastaǵan, alaıda olardy SQO PD UQQKB qyzmetkerleri bopsalaý arqyly talap etilgen somanyń 5 mln teńge kólemindegi bir bóligin alyp jatqan jerinde ustady.
QR Qylmystyq kodeksiniń 194-baby 2-bóligi 2-tarmaǵy boıynsha sotqa deıingi tergeý bastaldy. Qazir tintý sharalary men tergeý áreketteri júrgizilýde, olardyń nátıjeleri boıynsha túpkilikti prosestik sheshim qabyldanatyn bolady.