Zaýyt avtokólikterge arnalǵan qazaq tili ıntegrasıalanǵan mýltımedıalyq júıeler shyǵaratyn bolady
Almatyda Kazakhstan Mobility Engineering kompanıasy qazaq tili ıntegrasıalanǵan avtokólikterge arnalǵan mýltımedıalyq júıeler shyǵaratyn jańa zaýyt ashty. Kásiporyn Ońtústik Koreıanyń Motrex Co Ltd seriktesiniń tehnologıasyn qoldanady.
Jańa óndiris Memleket basshysynyń «Ádiletti Qazaqstan: Zań men tártip, ekonomıkalyq ósim, qoǵamdyq optımızm» atty Joldaýynda belgilengen maqsattarǵa sáıkes keledi. Ónerkásiptik áleýetti tolyq ashý úshin otandyq shıkizat pen komponentterdi paıdalanýdy qosa alǵanda, júıeli kózqaras qajet. Avtoónerkásiptiń ósýi Qazaqstannyń ónerkásiptik saıasatynyń negizgi baǵyttarynyń birine aınalyp otyr, sondyqtan óndiristik úderisterdi lokalızasıalaý men tereńdetýdi birlesip damytý mańyzdy. Zaýyttyń iske qosylýy — joǵary deńgeıde qaıta óńdeýdi meńgerý jáne iri ónerkásiptik nysandardyń aınalasynda irgeles óndiristerdi damytý qadamdarynyń biri. Kásiporyn «Astana Motors» kompanıasynyń quramyna kiredi.
«Mýltımedıalyq júıeler – bul joǵary dáldikti talap etetin óndiris, ol sıfrlyq tehnologıalar men ınjenerıa salasyndaǵy birinshi dárejeli mamandardyń quzyretin qajet etedi. Bizdiń basty maqsatymyz – lokalızasıanyń joǵary úlesi bar óndiris sıklin qurý. Biz otandyq shıkizat pen komponentterdi barynsha qoldanýǵa tyrysamyz. Sondyqtan Kazakhstan Mobility Engineering elimiz úshin erekshe mánge ıe», — dedi ónerkásip jáne qurylys mınıstri Qanat Sharlapaev zaýyttyń ashylý saltanatynda.
Úkimet otandyq óndirýshilerdi qoldaý maqsatynda keshendi sharalar qabyldaýda. Memleket basshysynyń tapsyrmasyna sáıkes, avtokólik óndirisinde klasterlik óndiristi damytý boıynsha jumystar júrgizilip jatyr, bul salanyń turaqty ósýine jáne syrtqy naryqtardaǵy ónimniń básekege qabilettiligin arttyrýǵa yqpal etpek. Sonymen qatar, bıyl aýyl sharýashylyǵy mashınalaryn jasaýda ımporttyq balamalardy sýbsıdıalaý toqtatyldy, al tehnıka lızıńiniń paıyzdyq mólsherlemesin sýbsıdıalaý kezinde otandyq ónimge tómendetilgen mólsherleme belgilendi. Temirjol tehnıkasyn óndirý sektorynda qoljetimdi lızıńtik qarjylandyrý mehanızmi iske qosyldy, nátıjesinde 2024 jyly óndiris kólemi 1,5 esege artty.
Kazakhstan Mobility Engineering zaýyty Almatynyń ındýstrıaldy aımaǵynda ornalasqan. Kásiporyn 100 myń sharshy metr aýmaqta avtokólik bólshekterin shyǵaratyn iri tehnoparktiń quramyna kiredi. Bul joba óndiristi lokalızasıalaýǵa jáne qazaqstandyq avtoónerkásipti qoldaýǵa baǵyttalǵan. Sonymen qatar, Almaty ındýstrıaldy aımaǵynda avtokreslolar, avtokólikterge arnalǵan rezeńke jáne plasık buıymdaryn shyǵaratyn zaýyttar men logıstıkalyq habty iske qosý josparlanyp otyr. Barlyq tehnoparktiń tehnıkalyq óndiristik qýaty jylyna shamamen 100 myń jıyntyqty quraıdy. Klaster aýmaǵynda 90-nan astam maman jumys istese, al búkil óndiristik keshende shamamen 400 qyzmetker jumys isteıdi dep kútilýde.