Almaty qalalyq perınatologıa jáne balalar kardıohırýrgıasy ortalyǵynda 3 aıdan 3 jasqa deıingi erekshe qajettiligi bar balalar osy zamanǵy halyqaralyq ádisteme boıynsha erte bastan ońaltýdan óte bastady. Jańa baǵyttyń iske qosylýynyń arqasynda jyl saıyn 600-deı bala erte qalpyna kelýge múmkindik alyp otyr.
Óńirlik komýnıkasıalar qyzmeti men Áleýmettik medısınalyq saqtandyrý qorynyń qalalyq bólimshesi uıymdastyrǵan baspasóz týrynda jýrnalıserge jańa ortalyqtyń jumysyn, mamandar qoldanatyn ádister men kómekti keńeıtýge múmkindik beretin ózgerister jaǵyn tanystyrdy.
Óńirde balamasy joq, qalanyń alǵashqy «Qamqorlyq» erte ońaltý ortalyǵy Perınatologıa jáne balalar kardıohırýrgıasy ortalyǵynyń (PıDKH) bazasynda 2025 jyldyń tamyzynda ashyldy. Az ýaqytta munda 57 bala qoldaý aldy. Ońaltý jaǵy tolyq MÁMS esebinen júrgiziledi, jeńildik sanatyndaǵy balalar medısınalyq kómektiń barlyq túrin tegin alady.
Erte aralasý ortalyǵynyń meńgerýshisi Shamshıgúl Qudajanovanyń aıtýynsha, ortalyq DSP, Daýn sındromy, sóıleý men psıhomotorlyq damýdyń kesheýildeýi, ortalyq júıke júıesiniń perınataldy zaqymy men tirek-qımyl júıesiniń týa bitken aqaýy bar balalarǵa baǵyttalǵan.
«Qamqorlyq» ortalyǵyna joldamany ata-analar tirkelgen emhanadan alady. Biz bala men ata-anasyn alǵashqy qadamynan bastap qoldaýǵa tyrysamyz, erte aralasqanda damýyn da túbegeıli ózgertýge bolady»,- deıdi maman.
Ortalyq medısınalyq qana emes, áleýmettik jáne bilim berý jaǵynan qoldaýǵa da erekshe nazar aýdarǵan.
«Munda biz balanyń damýyna, qabiletin ashyp, aınalasymen qarym-qatynas jasap úırenýine múmkindik beretin keńistik quramyz. Abılıtasıa, damytý oqytý, kognıtıvti, motorlyq jáne kommýnıkatıvtik daǵdylardy jetildirý arqyly biz balalardyń úılesimmen ósip-jetilýine jaǵdaı jasap jatyrmyz», – deıdi balalardyń medısınalyq psıhology Ánel Júnisova.
Munda shýngıt pen tuzdy bólme, sensorlyq bólme, sondaı-aq ımmersıalyq vana da bar. Ár balaǵa jeke baǵdarlamany mýltıdısıplınarlyq komanda — nevrolog, reabılıtolog, klınıkalyq psıholog, neonatolog, fızıoterapevt, LFK dárigeri, logoped jáne defektologtar ázirlep beredi.
Mamandardyń aıtýynsha, áseri alǵashqy aptadan-aq baıqalyp, balalar otyra bastaıdy, alǵashqy qadamyn jasap, sóıleıdi, motorıka men komýnıkasıa daǵdylarynda aıtarlyqtaı ilgerileý baıqalady.
Baspasóz týry barysynda jýrnalıser ortalyqta jatqan balalardyń ata-anasymen tildesti. Naýqastyń ájesi Olga Igısheva bylaı deıdi:
«Biz ortalyqqa bir aptadan beri baryp júrmiz, ózgeris bar. Bala belsendi, jınaqy bola bastady, buryn aıtpaǵan dybystardy aıtatyn boldy. Jaıly jaǵdaı jasalypty munda, mamandar da myqty», – deıdi ol.
Osyǵan uqsas oń ózgeristi Syzdyqbaevtar otbasy da baıqap qalǵan.
«Eki aptada qyzymyz dybys shyǵaryp, bulshyqetteri bekip, senimdi júrip, sekire bastady. Bizde Daýn sındromy, buryn ol taıǵanaqtap, qulap qala beretin. Munda massaj alady, logopedpen, psıhologpen jumys isteıdi. Óte rızamyz ortalyqtaǵylarǵa», – dedi ákesi Dinmuhammed Syzdyqbaev.
Aıta keteıik, 2019 jyly MÁMS engizilgenge deıin Almatyda balalarǵa tórt ortalyqta ǵana reabılıtasıalyq kómek kórsetiletin, jylyna 481,8 mln teńgedeı qarjy bólindi buǵan. Qazir jaǵdaı túbegeıli ózgerdi: 2025 jyldyń 9 aıynda óńirde 400 myńnan astam reabılıtasıalyq is-shara júrgizilip, qarjylandyrý kólemi qazir 2025 jylǵa 4 mlrd teńgeden asyp tústi.
«Balalar reabılıtasıasy buryn tegin medısınalyq kómekter paketine kiretin, biraq qarjylandyrý shekteýli bolǵandyqtan qajetti qarqynmen damı almady. MÁMS engizilgeli beri qyzmet kólemi men sapasy aıtarlyqtaı artyp, jańa tehnologıalar engizildi. Balalar barlyq kómekti burynǵydaı tegin alady, jarnany memleket tóleıdi», – dedi Qor ókili Shynar Áljanova.
Almatyda qazir18 jasqa deıingi balalarǵa qyzmet kórsetetin osyndaı 53 medısınalyq uıym jumys isteıdi. Kishkentaı pasıentterdiń saýyǵyp, jańa, deni saý ómirge qadam basatyn múmkindigi de jyl saıyn artyp keledi.