Óńírlík kommunıkatsıyalar qyzmetíníń baspasóz ortalyǵynda Almaty oblysy boıynsha 2025 jylǵy órt qaupí joǵary mausymnyń qorytyndysy shyqty. Spıker retínde Orman sharuashylyǵy jáne januarlar dúnıesí jóníndegí Almaty oblystyq aumaqtyq ınspektsıyasy basshysynyń orynbasary Baqytjan Jūmanov sóz sóılep, orman órtíníń betalysy, keltírílgen zalal men atqarylǵan aldyn alu ís-sharalary turaly málímetterdí ūsyndy.
Inspektsıyanyń aqparatyna sáıkes, 2025 jyly oblystyń memlekettík orman qory aumaǵynda jalpy audany 4 034 gektardy qūraıtyn 32 orman órtí tírkelgen. Onyń 1 776,8 gektary – ormandy jerler. Keltírílgen jalpy zalal 9,6 mln teńgege baǵalanǵan. 4 754,7 tekshe metr aǵashty órt shalǵan.
Tírkelgen oqıǵanyń sebepterí:
• 6 órt dala órtíníń, sonyń íshínde auyl sharuashylyǵyndaǵy órttíń ormandy sharpuynan shyqqan;
• 1 jaǵdaı – tūrǵyndardyń kínásínen;
• 7 órt – naızaǵaı túskennen;
• 19 jaǵdaı – belgísíz sebeptermen.
Baqytjan Jūmanovtyń aıtuynsha, bıyl orman órtíníń aumaǵy edáuír qysqarypty. 2024 jylmen salystyrǵanda 2 049 ga-ǵa azaıǵan (6 083 gektardan 4 034 gektarǵa deıín).
Órttíń taraluyna jol bermeu úshín memlekettík orman paıdalanushylar keshendí profılaktıkalyq jūmystar júrgízgen.
«2025 jyly orman órttíń aldyn alu maqsatynda oblystyń memlekettík orman paıdalanushylary 601 shaqyrym mıneraldy jolaq jasady, 2 581 shaqyrym qoldanystaǵy mıneraldanǵan jolaqtarǵa kútím jasady, 111 shaqyrym órtke qarsy ajyratu jolaqtaryn júrgízdí, tabıǵat qorǵau taqyrybyndaǵy 919 anshlag ornatty. Sonymen qatar órt qaupí joǵary mausym bastalǵanǵa deıín írgeles aumaqtarda 85 shaqyrymdaı jerdegí shóptesín ósímdíkterdí qoldan órttep shyqty», — dedí spıker.
Sonymen bírge barlyq írí derekke baılanysty qyzmettík tergeu júrgízílgení atap ótíldí. Dalada shyqqan órttíń basqa jerdí de sharpuy órttíń taraluyna negízgí sebep bolǵan. Qūmdy, batpaqty, tauly aımaqtarǵa baru da bíraz qıyndyq keltírdí.
11 orman órtíníń materıaly kínálí tūlǵalardy anyqtau úshín qūqyq qorǵau organdaryna joldandy. 2025 jyly órt qauípsízdígí erejelerín būzǵan 75 fakt anyqtalyp, 75 ákímshílík hattama toltyryldy. Aıyppūldyń jalpy somasy 14 mln teńgeden asyp, onyń 10,27 mln teńgesí 63 adamnan óndíríldí.