Taılandta 21 qarashaǵa qaraǵan túni "Ǵalam arýy - 2025" halyqaralyq sulýlyq baıqaýynyń jeńimpazy anyqtaldy. Táj meksıkalyq sulý Fatıma Bosh Fernandeske buıyrdy, - dep habarlaıdy aqshamnews.kz tilshisi.
Bul keshte Qazaqstan halqy 20 jastaǵy Dana Almasovaǵa erekshe qoldaý kórsetti.
Jeńimpaz týraly ne belgili?
26 jastaǵy Fatıma Bosh Fernandes keshtiń juldyzyna aınaldy. Ol syrt kelbetimen ǵana emes, bilimimen, qoǵamdyq belsendiligimen de kózge tústi: Fatıma ekologıalyq bastamalarmen, jastardyń múmkindigin keńeıtýge baǵyttalǵan áleýmettik baǵdarlamalarmen aınalysady. Fınalda ol áıelderdiń klımattyq kún tártibindegi róli týraly kózqarasy úshin eń joǵary baǵalardyń birin aldy.
Aıta keteıik, Fatımanyń esimi "Ǵalam arýy - 2025" jobasyna daıyndyq kezeńnen tanyldy. Baıqaý dırektory Navad Isasagrısıl daıyndyqta ony mindetti promo-aksıalarǵa belsendi qatyspady dep el aldynda aıyptady. Ol Fatımany "aqymaq" dep atady. Keıin birqatar qatysýshy Fatımaǵa qoldaý bildirý úshin zaldan shyǵyp ketken edi.
Qazaqstan atynan kim qatysty?
Dana Almasova - Qostanaı oblysynyń týmasy. Ol oqý, mansap jáne áleýmettik mısıany qatar alyp júretin jas býynnyń ókili. Halyqaralyq sahnaǵa deıin Almasova alty jyl boıy balalarǵa arnalǵan telebaǵdarlamada jumys istep, sportpen aınalysqan, ári PR men jarnama salasynda bilimin jalǵastyrǵan. Suhbattary men áleýmettik jelilerinde ol áıelderdiń damýy men ekologıalyq jaýapkershilik jaıyn kótergisi keletinin aıtyp, baıqaýdy "Qazaqstandy tanytyp, qyzdarǵa óz kúshine senýge shabyt beretin múmkindik" dep atap ótken. Kórermender Danyń daıyndyǵyn erekshe qyzyǵýshylyqpen baqylap otyrdy, ásirese taı boksy jattyǵýynan túsirilgen rolık kópshilikti tánti etti.
Qazaqstandyq arý jýrnalıser men kórermenderdi áser qaldyrǵan top-5 qatysýshynyń qataryna kirdi.