Almatyda jańa mamandyqtar men quzyretterdi tehnıkalyq jáne kásiptik bilim berý júıesine engizý máselesi qaralǵan forsaıt-sessıa ótti. İs-sharaǵa «Atameken» UKP, «Mamandyǵym – Bolashaǵym» jobalyq ofısi, salalyq qaýymdastyqtar, ÚEU, sondaı-aq kolej basshylary men oqytýshylar qatysty.
Jıynda kreatıvti ındýstrıalar, aqparat jáne baılanys, servıs pen qonaqúı bıznesi, qurylys pen ýrbanıstıka, kólik pen logıstıka jáne bilim berý syndy alty negizgi salaǵa nazar aýdaryldy.
Almaty Qurylys jáne menedjment koleji dırektorynyń orynbasary Juhargúl Ablızovanyń aıtýynsha, qurylys salasy qarqyndy ózgeristerge ushyrap otyr.
– Jańa mamandyqtar atlasyna osy baǵyt boıynsha 11 pozısıa engizildi. Olardyń qatarynda sıtı-menedjer, 3D-ǵımarattar jobalaýshysy, óndiristi robottandyrý mamany bar. Bul eńbek naryǵynyń naqty suranysyna saı keledi, – deıdi Juhargúl Ablızova.
Qonaqúı jáne týrızm ındýstrıasy koleji kásibı oqytý jónindegi dırektorynyń orynbasary Lılıa Rahımgereeva da óz salasyndaǵy ózgeristerdi atap ótti:
– Qonaqúı ındýstrıasynda kóptegen dástúrli mamandyqtar joıylyp, jańa baǵyttar paıda bolýda. Ekologıa, avtomattandyrý, sıfrlyq qyzmetter – basty trendter. Tek bizdiń sala boıynsha atlasqa 21 mamandyq engizildi. Bıyl alǵash ret «destınasıany basqarý» atty jańa mamandyq ashylyp, ishki týrızmdi damytýǵa baǵyttaldy, – dedi ol.
Almaty qalasy Bilim basqarmasyna qarasty Ǵylymı-ádistemelik ortalyqtyń tehnıkalyq jáne kásiptik bilim berý bóliminiń basshysy Gúlnar Súleımenova qorytyndysynda Jańa býynnyń eńbek naryǵyna daıyn bolýyna kolejder men jumys berýshilerdiń birlesken eńbegi qajet ekenin basa belgilep ótti. Ol forýmda 114 perspektıvaly mamandyǵy zerdelenip, sonyń ishinde 69 pozısıany engizý josparlanǵanyna toqtaldy:
– Bular 4 mamandyq, 29 quzyret, 26 modýl jáne 11 oqý nátıjesi. Bul qatarda vırtýaldy saıahat dızaıneri, qurylys salasyndaǵy robottandyrý mamandary bar. Jańa býynnyń eńbek naryǵyna daıyn bolýyna kolejder men jumys berýshilerdiń birlesken eńbegi qajet, – dedi ol.
Forsaıt-sessıa qorytyndysynda bilim berý baǵdarlamalary men standarttaryn jańǵyrtý jalǵasatyny belgili boldy. Maqsat – Almatydaǵy bilim berý júıesin sıfrlyq ekonomıkanyń talaptaryna beıimdep, jumys berýshilerdiń suranysyna saı kadrlar daıarlaý.