Almatydaǵy Raıymbek batyr kesenesi aýmaǵynda abattandyrý men qurylys jumystary bastaldy. Joba aıasynda tarıhı nysannyń aınalasy jańartylyp, osy zamanǵy mýzeı kesheni salynady. Óńirlik Komýnıkasıalar qyzmeti alańynda ótken brıfıńte qala ákiminiń orynbasary Azamat Qaldybekov osylaı dep habarlady.
Onyń aıtýy boıynsha, jobanyń basty maqsaty – kesene aýmaǵyn kıeli ári tartymdy mádenı ortalyqqa aınaldyrý, qala turǵyndary men qonaqtaryna tarıhı tulǵanyń erligin dáripteıtin jańa keńistik usyný.
«Qurylys jumystary barysynda kesene mańy tolyq abattanyp, eki jańa ǵımarat salynady. Onyń biri – eki qabatty mýzeı ǵımaraty. Birinshi qabatta mýltımedıalyq ekspozısıalar ornalassa, ekinshi qabatta qazaq batyrlaryna arnalǵan tarıhı zal ashylady. Mýzeı zamandyq VR jáne AR tehnologıalarymen jabdyqtalady» - dep atap ótti spıker.
Mýzeılendirý jumystary 2026 jyldyń aqpan aıynda bastalyp, mamyr aıynda tolyq aıaqtalady dep josparlanǵan. Bul joba Almatynyń tarıhı jáne týrısik áleýetin arttyrýǵa, ulttyq qundylyqtardy jańǵyrtyp, kelýshilerge Raıymbek batyrdyń erlik rýhyn jańa formatta tanystyrýǵa baǵyttalǵan.