Jańa jyl jaqyndaǵan saıyn Almatydaǵy Panfılov kóshesi qylqan japyraqtyń ıisi men merekelik kóńil-kúıge toly naǵyz qysqy bazarǵa aınaldy. Jármeńke árkim úıine jańa jyldyq shyrsha tańdaı alatyn almatylyqtardyń súıikti ornyna aınaldy, dep habarlaıdy aqshamnews.kz
Jármeńkede satyp alýshylarǵa bıik shyrshadan bastap shaǵyn ydystaǵy aǵashtarǵa deıin túrli taýar usynylǵan.
– Men jyl saıyn bazardan shyrsha satyp alamyn, biraq bıyl dál osy jerden satyp alýdy sheshtim, óıtkeni baǵasy birdeı. Balalarmen kelip shyrsha tańdap jatyrmyz, pirándikterden dám tatyp, jarqyraǵan qondyrǵylardyń janynda sýretke tústik. Mundaǵy atmosfera keremet, sharshaǵanyńdy umytasyń, sýyq ta sezilmeıdi. Jańa jyldyń jaqyndap qalǵany anyq seziledi, – dedi Erlan Qasymov.
Jármeńkede klasıkalyq qylqan japyraq aǵashtarymen qatar qarmen kómkerilgendeı sándelgen dızaınerlik shyrshalardy da satyp alýǵa bolady. Mundaǵy assortımenttiń moldyǵyn qala turǵyndary erekshe atap ótýde.
– Biz qurbymyzben jaı ǵana kórip qaıtýǵa kelgen edik, biraq qyzyǵyp, shyrsha, oıynshyqtar men gırlándalar satyp aldyq. Endi birge jınalyp, shyrshany bezendirip, kakao ishemiz. Munda sondaı ádemi, jyly ári jaıly, ketkiń kelmeıdi. Bul jármeńke qalanyń eń keremet oryndarynyń birine aınalǵanyna senimdimin, – dedi stýdent Alına Ábildaeva.
Jármeńkeniń bezendirilýi erekshe áser qaldyrady: gırlándalar, jarqyraǵan shamdar, fotoaımaqtar – munyń bári ǵajaıyp merekelik kóńil-kúı syılaıdy. Ásirese, qar basqan shanalar, jarqyraǵan aqqalalar men buǵynyń músinderi balalardy qýantady.
