Almatynyń halqy tyǵyz ornalasqan shaǵyn aýdanynda keshendi jaıaý júrginshiler aımaǵy paıda boldy, dep habarlaıdy Almaty-akshamy.kz
Turǵyndardyń tilegi boıynsha Almatynyń Naýryzbaı aýdanynyń ákimshilik kesheniniń bos aýmaǵyna «Shuǵyla city», «Alem city» TK baratyn jol jáne 90-100 avtokólik turatyn avtoturaq salyndy.
Joba «Halyq qatysatyn búdjet» baǵdarlamasy aıasynda iske asty, mundaǵy júrginshiler aımaǵynyń uzyndyǵy 400 metr ári abattandyrylǵan, oryndalǵany:
- aǵashtar otyrǵyzyldy;
- avtomattandyrylǵan sýarý júıesi ornatylǵan;
- shamdar men oryndyqtar qoıyldy.
Jaıaý júrginshiler aımaǵynyń bir bóligi aýdannyń kishkentaı turǵyndaryna arnalǵan. «Balalarǵa arnalǵan qala» dep atalatyn oıyn alańy órmeleýge arnalǵan ártúrli elementterden, úılerden, tik syrǵanaqtardan, labırıntterden, tonnelderden, qum jáshikterinen, baspaldaqtardan, torlardan jáne t.b. turady.
Oıyn aımaǵynda balanyń áleýmettik beıimdelýine jaǵymdy áser etetin ári fızıkalyq jáne aqyl-oı damýyna yqpal etetin balalardyń kóshe oıyndaryna arnalǵan barlyq qurylǵylar bar.
Aıta keterligi, bul shaǵyn aýdanda jalpy sany 7500 adamdy quraıtyn 40 kópqabatty turǵyn kesheni bar.
Almaty ákimi Erbolat Dosaevtyń tapsyrmasy boıynsha 2023 jyly Naýryzbaı aýdany «Halyq qatysatyn búdjet» baǵdarlamasyn iske asyrýǵa qosymsha 875 mln teńge aldy. Osylaısha, aýdanda 2,7 mlrd teńgeden astam somaǵa 67 joba iske asyrylýda.
Qala ákimi qosymsha qarjylandyrý týraly sheshimdi osy baǵdarlamanyń tıimdiligi men qala turǵyndarynyń oń pikirlerin eskere otyryp qabyldady.
Budan basqa, 2024 jylǵa «Halyq qatysatyn búdjet» baǵdarlamasyn qarjylandyrý ulǵaıtylady: qalanyń 6 aýdanyna 2 mlrd teńgeden jáne Alataý jáne Naýryzbaı aýdandary úshin 2,5 mlrd teńgeden bólý josparlanýda. Qosymsha qarajat halyqtyń eń ózekti jáne suranysqa ıe jobalaryn iske asyrýǵa baǵyttalatyn bolady.