30 sáýir kúni saǵat 11:00-de Almaty qalasynda sırenalar qosylady: jalpy qalalyq josparly seısmıkalyq jattyǵý ótkiziledi, dep habarlaıdy Aqshamnews.kz Almaty qalasynyń TJD-na silteme jasap.
Jalpyqalalyq seısmıkalyq jattyǵýǵa aldyn ala daıyndyq qolǵa alyndy: 28 sáýirden bastap tele-radıoarnalarda aldaǵy josparly jattyǵý týraly beınerolıkter men sabyr saqtaýǵa shaqyratyn habarlamalar kórsetilip jatyr.
Seısmıkalyq jattyǵý ótetin kúni saǵat 11:00-de qalalyq habarlaý júıesi iske qosylady: sırenalyq-daýys habarlaý qurylǵylary, tele-radıoarnalardy avtomatty túrde toqtatyp, shuǵyl aqparat berý, mobıldi qosymshalar arqyly habarlamalar jiberý josparlanǵan.
«Barshanyń nazaryna!!!» dybystyq sıgnaly – bul tótenshe jaǵdaı qaýpi nemese týyndaǵan jaǵdaıda halyqtyń nazaryn aýdarý úshin beriletin eskertý sıgnaly.
Dybystyq sıgnaldy estigen kezde dereý teledıdar men radıoqabyldaǵyshty qosyp, ınternet-resýrstar men mobıldi qosymshalar arqyly resmı aqparat alyp, odan ári áreket etý boıynsha nusqaýlarmen tanysý qajet.
Seısmıkalyq jattyǵý bastalǵanǵa deıin dabyl shabadanyn daıyndańyz, qaýipsiz jerge aparatyn eń qysqa joldy anyqtańyz. Esterińizge sala keteıik, qaýipsiz oryn – bul elektr jelilerinen, aǵashtardan jáne ǵımarattardan alys ornalasqan ashyq alań.
Almaty qalasynda halyqty qabyldaıtyn 384 pýnkt bar. Tolyq aqparatpen myna silteme arqyly tanysýǵa bolady: https://www.gov.kz/memleket/entities/emer-almaty/documents/details/379263?lang=ru
Halyqty qabyldaý pýnktteri týraly tolyq aqparat 2GIS kartasynda «zardap shekken halyqty qabyldaý pýnktteri» dep izdeý arqyly jáne Almatynyń Tótenshe jaǵdaılar departamenti men ákimdiktiń resmı saıtynan tabýǵa bolady.
Ári qaraı qoljetimdi habarlaý quraldary (daǵdarys shabadanyndaǵy radıoqabyldaǵysh, mobıldi qosymshalar, sırenalyq-daýys qurylǵylary jáne t.b.) arqyly kelesi is-áreketter boıynsha nusqaýlyqtardy qatań saqtańyz.
Ótkizilip jatqan qalalyq seısmıkalyq jattyǵý josparly túrde júrgiziletinin eske salamyz. Azamattardy sabyr saqtaýǵa jáne belsendi qatysýǵa shaqyramyz.