Qazaqstanda balalar men eresekterdi vaksınalaý Ulttyq profılaktıkalyq egýler kúntizbesi aıasynda tegin júrgiziledi.
Almaty №36 qalalyq emhanasynyń ımmýnolog dárigeri Ásel Eralyqyzynyń aıtýynsha, ekpe memlekettik emhanada jáne azamattar tirkelgen jeke medısınalyq uıymda qoljetimdi.
Sábıge alǵashqy ekpe perzenthanada-aq salynady: týǵannan keıingi alǵashqy 12 saǵat ishinde V gepatıtine qarsy vaksına, al 3-5-kúnderi týberkýlezden qorǵaý úshin BSJ vaksınasy egiledi.
Eki aıynda bala V gepatıtine qarsy vaksınanyń ekinshi dozasyn, AbKDS-qa (kókjótel, dıfterıa jáne sirespege qarsy) qarsy alǵashqy vaksınasyn, ınaktıvtelgen polıomıelıt vaksınasynyń (IPV) birinshi dozasyn, V tıpti gemofıldi ınfeksıaǵa qarsy jáne pnevmokok ınfeksıasyna qarsy alǵashqy vaksınalardy alady.
Úsh aıynda balaǵa AbKDS-tiń ekinshi vaksınasy, polıomıelıtke qarsy ekinshi doza jáne gemofıldi ınfeksıaǵa qarsy ekinshi vaksınalaý júrgiziledi. Tórt aılyǵynda AbKDS-tiń úshinshi vaksınasy, polıomıelıt pen gemofıldi ınfeksıaǵa qarsy úshinshi ekpe jáne pnevmokok ınfeksıasyna qarsy ekinshi vaksına salynady. Alty aıynda bala V gepatıtine qarsy vaksınanyń úshinshi dozasyn qabyldaıdy.
Bir jasynda balaǵa qyzylsha, qyzamyq jáne epıdemıalyq parotıtke (KQP) qarsy alǵashqy vaksınalaý, polıomıelıtke qarsy (aýyz arqyly) tórtinshi vaksınalaý, sondaı-aq pnevmokok ınfeksıasyna qarsy úshinshi vaksınalaý júrgiziledi.
Bir jarym jasynda (18 aı) balaǵa AbKDS alǵashqy revaksınalaý jáne polıomıelıtke qarsy alǵashqy revaksınalaý jasalady.
Eki jasynda epıdemıologıalyq kórsetkishter boıynsha balaǵa V gepatıtine qarsy vaksınalaý júrgiziledi, al 6 aıdan keıin ekinshi doza egiledi.
Alty jasynda balalarǵa qyzylsha, qyzamyq jáne epıdemıalyq parotıtke qarsy revaksınalaý, sondaı-aq AbKDS vaksınasymen revaksınalaý jasalady.
2024 jyldan bastap Qazaqstanda 11-13 jas aralyǵyndaǵy qyzdarǵa adam papıllomasy vırýsyna (APV) qarsy vaksınalaý engizildi. Vaksınalaý eki dozada alty aılyq aralyqpen júrgiziledi.
16 jasynda jasóspirimderge ADS-M (dıfterıa men sirespege qarsy az mólsherli) vaksınasymen revaksınalaý jasalady.
Eresek jasta ár 10 jyl saıyn sońǵy revaksınalaýdan keıin dıfterıa men sirespege qarsy ımýnıtetti saqtaý úshin ADS-M vaksınasymen qaıta egýden ótý qajet.
Qazaqstandaǵy tegin ekpeler týberkýlez, V gepatıti, kókjótel, dıfterıa, sirespe, polıomıelıt, gemofıldi ınfeksıa, pnevmokok ınfeksıasy, qyzylsha, qyzamyq, epıdemıalyq parotıt, A gepatıti jáne adam papıllomasy vırýsy sıaqty eń qaýipti ınfeksıalyq aýrýlardan qorǵaýǵa baǵyttalǵan. Olar - halyq densaýlyǵyn qorǵaý jáne ınfeksıalyq aýrýdyń aldyn alý jónindegi memlekettik baǵdarlamanyń mańyzdy bóligi.
Qazaqstanda 27 sáýir men 3 mamyr aralyǵynda, kóptegen basqa eldegideı, Eýropalyq ımmýndaý aptalyǵy ótedi. Bul jyl saıynǵy bastama halyqtyń vaksınalaýdyń ómir men densaýlyqty qorǵaýdaǵy mańyzy týraly habardarlyǵyn arttyrýǵa baǵyttalǵan. Apta aıasynda aqparattyq naýqandar, dárigerlermen kezdesý, dárister men aldyn alý sharalary uıymdastyrylyp, balalar men eresekterdi ýaqtyly vaksınalaýdyń qajettigi eske salynady.
Tegin ekpeni alý úshin tirkelgen emhanaǵa júginý qajet. Vaksınalaý jas ereksheligine sáıkes qatań grafık boıynsha, sondaı-aq qajet bolǵan jaǵdaıda epıdemıologıalyq kórsetkish boıynsha júrgiziledi.