Qazaqstan, Qyrǵyzstan, RF, Ózbekstan, Ázirbaıjan, Grýzıa, Germanıa, Túrkıa, Shvesıa men Ýkraına ishki medısınasynyń ár baǵyttaǵy jetekshi mamandaryn bir alańda biriktiretin aýqymdy is-shara bizdiń elimizde alǵash ret ótip otyr, dep habarlaıdy aqshamnews.kz.
Uıymdastyrýshylary - QR Densaýlyq saqtaý mınıstrligi, Kardıologıa jáne ishki aýrýlar ǴZI, Qazaq ishki medısına mamandarynyń qaýymdastyǵy jáne Qazaq ishek aýrýlaryn zertteý jónindegi ǵylymı qoǵamy.
Kongreske elimizdiń barlyq óńirinen kelgen terapevter, jalpy praktıka dárigerleri, endokrınolog, kardıolog, kardıohırýrg, reanımatolog, ıntervensıonıst, nefrolog, alergolog, revmatolog, pýlmonolog, gematolog, gastroenterolog, endoskopıst, orfandyq aýrýlardy baqylaýǵa tartylǵan dárigerler qatysýda.
Kongrestiń mindeti - ishki medısınanyń negizgi baǵyttary boıynsha zamanaýı teorıalyq jáne praktıkalyq tájirıbeni biriktirý. Qatysýshylar dıagnostıka men emdeýdiń álemdik trendterin, yntymaqtastyq máselelerin talqylaýda. Kongres elimizdegi medısınalyq kómektiń sapasyn jaqsartýǵa múmkindik beretin bilim men úzdik klınıkalyq tájirıbelerdi shoǵyrlandyrý alańyna aınaldyrýǵa baǵyttalǵan.
Dárigerler men ǵalymdar zamanaýı klınıkalyq praktıkanyń ózekti máselelerin, aýrýlardy dıagnostıkalaý men emdeýdegi jańa ǵylymı tásilderdi talqylaýda. İs-shara terapıa, revmatologıa, kardıologıa, endokrınologıa, gastroenterologıa, nefrologıa, alergologıa jáne basqa da salalardaǵy birlesken jumys pen úzdik tájirıbelerdi shoǵyrlandyrý úshin biregeı alańǵa aınalyp otyr.
«Bizdiń ınstıtýt terapıalyq beıindegi pasıentterge mamandandyrylǵan kómekti damytyp, engizý ústinde. Kóptegen sozylmaly ınfeksıalyq emes aýrýlardy emdeýde erte dıagnostıkalaý men terapıanyń túrli jańa tehnologıalaryn úzdiksiz engizýdemiz. Instıtýtta orfandyq jáne endokrındik patologıa, dıabettik taban boıynsha mamandandyrylǵan ortalyqtar, sondaı-aq ishektiń qabyný aýrýlary bar naýqastarǵa arnalǵan ortalyq jáne nýtrıtıvtik qoldaý kabıneti jumys isteı bastady. Bul tásil terapıanyń tıimdiligin arttyrady jáne ishki aǵzalardyń túrli aýrýlaryn emdeý nátıjelerin jaqsartady», - deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
Erteń de jalǵasatyn is-sharada halyqaralyq tájirıbesi bar sarapshylardyń baıandamalary tyńdalady, paneldik pikirtalastar, klınıkalyq jaǵdaılardy taldaýmen praktıkalyq sesıalar ótedi, sondaı-aq “Jas ǵalymdar” baıqaýynyń jeńimpazdary marapattalady.