Megapolıs ákimi Baqytjan Saǵyntaev jumys sapary kezinde qalanyń densaýlyq saqtaý júıesin damytý sharalary aıasynda salynǵan № 7 QKA qabyldaý bólimin aralap kórdi, dep habarlaıdy Almaty-akshamy.kz.
Medısınalyq mekemeni keńeıtý Almatynyń densaýlyq saqtaý júıesin damytýdyń jol kartasy aıasynda júrgizildi. Bólimshe barlyq zamanaýı talaptarǵa saı.
Qabyldaý bólimi qýatty avtonomdy jeldetý júıesimen, zamanaýı emdeý-dıagnostıkalyq jabdyqtarmen, sonyń ishinde kompúterlik tomografpen, rentgen qondyrǵysymen, ÝZI apparattarymen jabdyqtalǵan. Budan basqa, operasıalyq zaldar, sondaı-aq reanımasıalyq jáne qarqyndy terapıa palatalary qarastyrylǵan.
Qabyldaý bóliminiń jańa ǵımaraty barlyq sanıtarlyq jáne tehnıkalyq normalar men standarttarǵa saı ári bilikti kómek kórsetý úshin medısınalyq personal daıyndalǵan.
Jańa ǵımarat jylyna 100 myńǵa deıingi naýqasty qabyldaýǵa eseptelgen. Táýlik saıyn qalalyq klınıkalyq aýrýhanaǵa 300-den 500-ge deıin pasıent júginedi. Jylyna – 80 myńnan astam adam, onyń 25 myńǵa jýyǵy stasıonarda emdelýde.
Buǵan deıin, Táýelsizdiktiń 30 jyldyǵy qarsańynda Naýryzbaı aýdanyndaǵy №36 emhana men Alataý aýdanyndaǵy №25 emhana janynan zamanaýı KT-ortalyqtary ashylǵan bolatyn. Osynyń arqasynda joǵary mamandandyrylǵan medısınalyq-dıagnostıkalyq kómek alý úshin qadamdyq qoljetimdilik, sondaı-aq shuǵyl jáne josparly pasıentterdiń patologıalaryn erte anyqtaý múmkindigi qamtamasyz etildi.
Habarlanǵandaı, búginde Almatynyń densaýlyq saqtaý nysandaryn jabdyqtaý kórsetkishi 91,5%. Anestezıologıa, reanımasıa jáne qarqyndy terapıa bólimsheleriniń jabdyqtalýy 100%-ǵa deıin jetkizildi. Jedel medısınalyq járdem jumysy jaqsartyldy, 3 jańa qosalqy stansıa salyndy. Brıgadalar sany eki esege artty. Avtopark 70%-ǵa jańardy.
Tuńǵysh Prezıdent – Elbasy N. Nazarbaevtyń tapsyrmasy boıynsha aǵymdaǵy jáne yqtımal epıdemıologıalyq qaterlerge den qoıý boıynsha eldiń ǵylymı-medısınalyq áleýetin shoǵyrlandyrý maqsatynda Almatyda ınfeksıalyq aýrýlardyń kópbeıindi ǵylymı-zertteý ortalyǵynyń qurylysy bastaldy.
Aǵymdaǵy jyly úsh emhananyń, 9 otbasylyq-dárigerlik ambýlatorıanyń qurylysy bastaldy. Balalarǵa shuǵyl kómek kórsetý ortalyǵynyń jáne №2 BQKA qosymsha korpýstarynyń, pallıatıvtik kómek ortalyǵy bar jańa onkologıalyq ortalyqtyń jáne Medeý aýdanynda kópbeıindi stasıonar ǵımarattarynyń qurylysy júrýde.
250 tósektik balalardy ońaltý ortalyǵyn jáne 50 tósektik erte aralasý ortalyǵyn ornalastyrý úshin burynǵy Almaty temir jol aýrýhanasyn rekonstrýksıalaý jáne kúrdeli jóndeý josparlanýda.