Tártip saqshylary halyqtan qarapaıym saqtyq sharalaryn saqtaýdy suraıdy.
Almaty polıseıleri Instagram arqyly «saýda» jasaǵan eki alaıaqty ustady, dep habarlaıdy Almaty-akshamy.kz Polisia.kz saıtyna silteme jasap.
Almatynyń krımınaldyq polısıasy Instagram jelisinde brend kıimderdi satý syltaýymen adamdardy aldap ketken eki jergilikti turǵyndy ustady.
«Alaıaqtyq tizbegi óte qarapaıym boldy. Ustalǵandardyń biri – 25 jastaǵy I.esimdi azamat áleýmettik jelide mynadaı eki paraqsha ashqan: «almaty.sneaker» jáne «top.sneakerkross». Túrli-tústi sýretter men jeńildikter týraly aqparatty ornalastyrǵan. Onyń 19 jastaǵy seriktesi bolashaq satyp alýshylarmen baılanysyp, sáıkesinshe, tapsyrystar men tólemderdi qabyldaǵan. Aldyn ala tólem beıtanys adamnyń banktik kartasyna túsip otyrady. Al paıdany olar ekige bóledi, – deıdi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Qalanyń bes turǵyny osyndaı alaıaqtyq tizbekke ilingen. Ár klıentten alaıaqtar krosovka satamyn dep 15-ten 20 myń teńgege deıin aqsha alǵan. Al aryz berýshiler qarajatty aýdarǵannan keıin aıaq kıimsiz jáne aqshasyz qalǵan.
Kúdiktilerge qatysty QR QK-niń 190-baby 2-bólimi 4-tarmaǵy (Alaıaqtyq) boıynsha sotqa deıingi tergeý júrgizilýde. Polısıa ınternette jeńildikter men tartymdy baǵalary bar túrli-tústi akkaýnttardyń qoldanýshylar nazaryn aýdaratynyn atap ótti. Ádette, olardyń kópshiligi taýarlardyń qolda bar ekenine kóz jetkizbesten, elektrondy ámıanǵa aldyn ala tólemdi aýdarady.