ÚEU men sarapshylar qoǵamdastyǵynyń ókilderi múmkindigi shekteýli azamattardyń ómirine teń múmkindikter jasaý jónindegi jumysty úılestirý úshin kúsh biriktiredi.
Barlyq sanattaǵy múgedek adamdardyń múddelerin bildiretin ÚEU basshylary, sondaı-aq jergilikti atqarýshy organdardyń basshylary men Almaty aýdandarynyń ákimderi enetin keńestiń quramy qalalyq máslıhattyń kezekten tys ótken XIV sesıasynda bekitildi. Kandıdattardy irikteý kezinde múgedekterdiń quqyqtaryn qorǵaý jáne múmkindikterin keńeıtý salasyndaǵy qoǵamdyq jumys tájirıbesi, sondaı-aq zań shyǵarý, ǵylymı nemese saraptamalyq jumys tájirıbesi eskerildi.
Keńes tóraǵasy Almaty qalasynyń ákimi Erbolat Dosaev, tóraǵanyń orynbasarlary – ákimniń orynbasary Ásem Núsipova jáne ákimniń shtattan tys keńesshisi Qasıet Omarova. Sondaı-aq, keńes quramyna múmkindigi shekteýli jandardyń quqyqtaryn qorǵaý salasyndaǵy belgili qoǵam qaıratkerleri Bogdan Djepka, Tatána Baklajanskaıa, Maıra Súleeva, Ásıa Ahtanova, Raýana Saǵadıeva jáne basqalary endi.
Jańa keńes jergilikti atqarýshy organdardyń, uıymdardyń, qoǵamdyq birlestikterdiń quqyqtaryn iske asyrý jáne tirshilik úshin teń múmkindikter jasaý máseleleri boıynsha qyzmetti úılestirý jóninde usynystar ázirleıdi. Sonymen qatar, keńeske qatysýshylar qalada ınklúzıvti ortany qalyptastyrý máselelerimen aınalysatyn bolady.
Búginde Almatyda múmkindigi shekteýli jandardyń ómirin jeńildetýge baǵyttalǵan birqatar sharalar júzege asyrylýda. Atap aıtqanda, 100 avtokólikte «Invataksı» qyzmetteri usynylady. 2023 jyldyń shildesinen bastap «Iandeks taksı» taksı agregatory arqyly qyzmetti iske asyrý boıynsha pılottyq joba iske qosyldy, bul muqtajdardy qamtýdy 1,5 myńnan 2 myń adamǵa deıin ulǵaıtýǵa múmkindik berdi.
Budan basqa, Almaty qalasy ákiminiń tapsyrmasy boıynsha «Ten Qogam» múgedektigi bar adamdardy áleýmettik qoldaý ortalyǵy» áleýmettik jobasyn aýqymdy etý boıynsha sharalar qabyldandy. Qala aýdandarynda 8 ortalyq ashyldy, onda 2023 jyly 6 454 adam qyzmet aldy. 2023 jyly Almatyda ınteraktıvti qoljetimdilik kartasyna derekterdi inva.gov.kz. engize otyryp, qalanyń 7,5 myń nysany pasporttaldy.
Múgedektigi bar adamdar úshin qoljetimdi ortany jáne teń múmkindikterdi qamtamasyz etýge baılanysty máseleler boıynsha +7 705 541 65 40, Amanat Abaıuly Sultanǵazıevke, JÁBB teń múmkindikter bóliminiń basshysyna habarlasý qajet.