Erbolat Dosaevtyń tóraǵalyǵymen qalanyń ınklúzıvti ortasyn damytý jónindegi Keńestiń II otyrysy ótti.
Otyrys barysynda «Inklúzıvti Almaty» tujyrymdamasyn ázirleý, ınklúzıvti bilim berýdi damytý, erekshe qajettiligi bar adamdardy áleýmettik qamsyzdandyrý máselesi qarastyryldy, dep habarlaıdy aqshamnews.kz
İs-sharaǵa qala ákiminiń ınklúzıa máselesi, múgedektigi bar adamdardyń quqyǵyn qorǵaý jáne ómir súrý sapasyn jaqsartý jónindegi shtattan tys keńesshisi, Keńes tóraǵasynyń orynbasary Qasıet Omarova, Almaty qalasy ákiminiń shtattan tys keńesshisi – balalar quqyqtary jónindegi ýákil Dıana Erlan, erekshe qajettiligi bar adamdardyń múddesin qorǵaıtyn qoǵamdyq birlestikterdiń basshylary, Qoǵamdyq keńes músheleri jáne memlekettik organdardyń basshylary qatysty.
Kezdesý barysynda qala ákimi ınklúzıvti ortany qurý ákimdik pen azamattyq qoǵamdy biriktirýshi mısıa ekenin atady.
«Búgingi jasap jatqan árbir qadamymyz qalamyzdyń bolashaǵyn aıqyndaıdy. Almaty árbir turǵynǵa degen ádil ári qamqor qarym-qatynasta úlgi bolýy kerek. Bárimiz osy maqsatqa jetý úshin jumysymyzdy belsendi túrde jalǵastyryp, jańa ıdeıalardy engizip, bastamalarymyzdy qorǵaýymyz qajet», - dedi Erbolat Dosaev.
Ákimniń ınklúzıa máselesi jónindegi shtattan tys keńesshisi Qasıet Omarova otyrys barysynda BUU-nyń múgedektigi bar adamdardyń quqyǵy týraly Konvensıasyn júzege asyrýǵa arnalǵan 2020-2025 jyldarǵa arnalǵan Berlın is-qımyl josparynyń negizinde «Inklúzıvti Almaty» baǵdarlamasynyń tujyrymdamasyn ázirleý týraly aıtyp berdi.
Memlekettik qyzmet pen azamattyq qoǵam qurylymynda arnaıy uıymdar – federaldyq, qalalyq jáne aýdandyq deńgeıdegi úılestirý ortalyǵyn iske asyrýdyń mehanızmi men quraly retinde quryldy.
«Biz basqarmalarǵa daıyndyqtan ótken úılestirýshilerdi taǵaıyndaı otyryp, «Inklúzıvti Almaty» tujyrymdamasyn júzege asyrý úshin jobalyq keńse qurýdy, sondaı-aq kedergisiz qurylys ortalyǵy, sıfrlyq ınklúzıa bólimi jáne basqa da jańa qurylymdardy qurýdy usynamyz», - dedi Qasıet Omarova.
Qala ákimi usynylǵan bastamalardy qoldap, «Inklúzıvti Almaty» tujyrymdamasyn jáne osy baǵyttaǵy jumystardy baqylaý úshin memlekettik tapsyrysty ornalastyrýǵa arnalǵan jeke búdjet baǵdarlamasyn ázirleý múmkindigin qarastyrýdy tapsyrdy.
Otyrysta erekshe qajettiligi bar balalarǵa bilim berý múmkindikterine teń qoljetimdilikti qamtamasyz etý máselesine erekshe nazar aýdaryldy.
Almaty qalasy Bilim basqarmasynyń basshysy Saıran Saıfedenovtyń aıtýynsha, 2023-2024 oqý jylynda balabaqshalarda, mektepterde jáne kolejderde ınklúzıvti bilimmen 4663 bala qamtylǵan.
Sonymen qatar, Almaty qalasy ákiminiń tapsyrmasymen 21 jeke uıymda qosymsha ınklúzıvti bilim berýge memlekettik bilim berý tapsyrysy júzege asyrylyp jatyr. Oń nátıje kórsetken bul tájirıbe jalǵasady.
«Erekshe qajettiligi bar 650 bala alǵash ret qosymsha bilimmen qamtyldy, oǵan 480 mıllıon teńge bólindi. Biz osy salada jumys isteıtin ÚEU-dardy shaqyrýǵa jáne qajetti memlekettik tapsyrysty ornalastyrýǵa daıynbyz, osylaısha erekshe balalardy qosymsha bilimmen kóbirek qamtýǵa múmkindik alamyz. Sonymen qatar, bul máselede bilikti maman daıarlaýǵa da búdjetten qarajat bólýge daıynbyz», - dedi qala ákimi.
Jıynda erekshe qajettiligi bar azamattardyń ómir súrý sapasyn jaqsartý jáne áleýmettik qoldaý máselesi de qaǵys qalmady. Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasovtyń aıtýynsha, bıyl jyl sońyna deıin Almatynyń árbir aýdanynda basqarmaǵa qarasty uıymdar bazasynda Erte aralasý qyzmeti qurylady. Bul jumysty úılestirý úshin bilim berý, densaýlyq saqtaý, jumyspen qamtý jáne áleýmettik baǵdarlamalar basqarmalarynyń ókilderinen jasaqtalǵan komısıa quryldy.
Qala ákiminiń tapsyrmasymen 288 adamǵa 1,3 mıllıard teńgege jeke ınovasıalyq qymbat tehnıkalyq ońaltý quraldarymen qamtamasyz etý jumystary jalǵasýda. Mobıldilikti arttyrý úshin bıyl ınvataksı sany 100 kólikke deıin artty. Bıyl shyǵarmashylyq qabiletter men áleýmettendirýdi damytý maqsatynda «Áleýmettik ıntegrasıa ortalyǵy» ashyldy. Sanatorlyq-kýrorttyq uıymdardyń tizimi eki ese kóbeıip, jumysqa ornalastyrý boıynsha jumystar jalǵasyp otyr.
15 myń nysannyń tólqujaty jasalyp jatyr. Qabyldanǵan «MSAK biryńǵaı standarty» baǵdarlamasynda fızıkalyq, aqparattyq jáne sıfrlyq qoljetimdilikti qamtamasyz etý kózdelgen. Sondaı-aq, buryn salynǵan áleýmettik nysandar bul talaptarǵa árdaıym saı kelmeıdi. Osyǵan baılanysty Erbolat Dosaev qalalyq josparlaý jáne ýrbanıstıka basqarmasynyń basshysyna Keńes múshelerimen birlesip, qurylys erejelerine ınklúzıa normalaryn qosý boıynsha usynystar engizýdi tapsyrdy.
Buǵan qosa, jıynda qoǵam qaıratkerleri de usynys aıtty. Atap aıtqanda, ınklúzıvti bilim berý salasynyń sarapshysy Álıa Arharova vedomstvoaralyq ózara is-qımyldy kúsheıtý jáne pedagogıkalyq kadrlardyń áleýetin nyǵaıtý qajettigin atap ótti. «Erekshe balalary bar ata-analar odaǵy» RQB basqarma tóraǵasy Raýana Saǵadıeva ınklúzıvti hab - mamandyqtar akademıasyn qurý máselesin kóterdi, onda múgedektigi bar balalardy tárbıelep otyrǵan ata-analar qosymsha bilim alyp nemese korreksıalyq pedagogıka boıynsha qaıta daıarlaýdan óte alar edi. «Jan» múgedekter quqyqtary jónindegi Azıalyq qoǵam» qoǵamdyq birlestiginiń tóraǵasy İlıas Fatkýlın kórý qabileti buzylǵan múgedektigi bar balalardy sıfrlyq daǵdylarǵa oqytý boıynsha pılottyq jobany usyndy. Kásibı áleýmettik qyzmetkerlerdiń ulttyq alánsynyń fılıal jetekshisi Janar Ábdihalyqova múgedektigi bar balalarǵa mektepterde bilim alý jaǵdaıyn jasaý qajettiligi týraly máseleni kóterdi. «Qaırat Imanalıev atyndaǵy múgedekterdiń quqyǵy jónindegi komısıa» QB tóraıymy Gúlmıra Býrasheva múgedektigi bar adamdardy salalyq sarapshylar ǵana emes, memlekettik qyzmetshiler retinde de ákimdiktiń barlyq qurylymdyq bólimshesine tartý týraly usynys aıtty.
Óz kezeginde Almaty qalasy múgedekter qoǵamynyń tóraǵasy Ulan İńkárbekov Keńestiń ákimdik pen ÚEU arasyndaǵy tıimdi dıalog alańyna aınalǵanyn, munda myńdaǵan azamattyń qoljetimdi ortasyn qamtamasyz etý máselesi sheshiletinin atap ótti.
Otyrystyń qorytyndysy boıynsha Almatydaǵy ınklúzıvti ortany odan ári damytý boıynsha qurylymdyq bólimshelerge usynystar men keńester ázirlendi. Qala ákimi Keńes múshelerimen «Inklúzıvti Almaty» tujyrymdamasyn ázirleý boıynsha yntymaqtastyqty jalǵastyrýdy tapsyrdy.