It kúdiktilerdi taýyp bergen.
Almatyda jappaı tóbeleske qatysýshylar ıisshil ıttiń kómegi arqyly anyqtaldy. «Agat» atty qyzmettik-izdestirý ıti oqıǵa ornynda qalǵan qan arqyly kúdiktilerdi taýyp bergen, dep habarlaıdy Almaty-akshamy.kz Almaty.tv silteme jasap.
Tóbeles Jandosov pen Áýezov kósheleriniń qıylysynda ornalasqan úılerdiń aýlasynda bolǵan.
«Oqıǵa ornyna aldymen patrúldik ekıpaj keldi. Sodan keıin biz tergeý-jedel tobynyń quramyndamyz. Kóshede qanǵa boıalǵan ústeldiń aıaǵy, asqana pyshaǵy, qan, basqa da tóbelestiń izderi anyqtaldy. It izin sezip, jaqyn jerdegi úıdiń páterleriniń birine apardy. Esik ashyq boldy. İshinde alty er adam boldy, bireýi qulaǵynan jaralanǵan», – dedi Almaty qalalyq PD OKQ kishi ınspektor-kınology Erbolat Kóktal.
Jappaı tóbeles uıymdastyrǵan bir top adam pyshaqtan bólek, atys qarýyn da qoldanǵan.
Polısıa qyzmetkerleri ustalǵandardyń birinen kesilgen ańshy myltyǵy men pyshaq tárkilegen. Kıimi men qolynda qan izi qalǵanyna qaramastan, tóbeleske qatysqanyn múlde joqqa shyǵaryp otyr. Atalǵan derek boıynsha sotqa deıingi tergeý bastaldy.
«Qylmysqa qatysýshylar ustaldy. Kimniń qarý qoldanǵanyn Bostandyq aýdandyq polısıa basqarmasynda bastalǵan ári qaraı tergeý amaldary barysynda anyqtalatyn bolady», – dedi Almaty qalasy PD JPQB patrúldik polısıa polkiniń ınspektory Asqar Jyrǵalbaı.