Almatyda 26-30 shilde aralyǵynda Qazaq memlekettik sırkinde ALMATY CIRCUS FESTIVAL I Halyqaralyq sırk óneri festıvali ótti. Bul is-shara Qazaqstanda alǵash ret ótti, 5 kún ishinde sırkke 8 myńǵa jýyq adam qatysty, dep habarlaıdy almaty-akshamy.kz
Festıvál aıasynda 28 shildede qazylar alqasy jáne qonaqtarmen BAQ ókilderine arnalǵan baspasóz konferensıasy uıymdastyryldy. Sol kúni sırk ǵımaratynda festıvál saltanatty túrde ashyldy, onda sheteldik jáne otandyq gımnasttar, akrobattar men jonglerler festıváldiń eń joǵary nagradasyn alý úshin ózderiniń talanttary men kásibı sheberlikterin kórsetti.
«Biz mundaı festıváldi alǵash ret ótkizip otyrmyz jáne sol arqyly álemdegi otandyq sırk óneriniń úzdik jetistikterin saqtaý, damytý jáne ilgeriletýdiń qarapaıym maqsatyn basshylyqqa alamyz», - dep atap ótti Qazaq memlekettik sırkiniń dırektory Maqsat Jaıyqov.
Festıváldiń barlyq bes kúninde álemniń 14 elinen: Qazaqstan, Germanıa, Vetnam, Efıopıa, Iakýtıa, Ýkraına, Belarýs, Reseı, Ulybrıtanıa, Lıtva, Chehıa, Ózbekstan, Qyrǵyzstan jáne Tájikstannan kelgen ártister men sırkshiler bir sahnada óner kórsetti.
Qala turǵyndary men qonaqtary úshin Qazaq memlekettik sırkiniń manejinde sırk óneriniń barlyq janrlarynda ekvılıbrıser, akrobattar, arqanmen júrýshiler, saıqymazaqtar men jonglerler oryndaǵan úzdik nómirler usynyldy. İs-shara baǵdarlamasyna kaskaderlik ónerdiń álemdik juldyzdary bolyp tabylatyn jáne Netflix, HBO halyqaralyq jobalaryna qatysatyn teńdesi joq otandyq «Nomad» at sporty mektebiniń at-akrobatıkalyq nómirleri usynyldy.
30 shildede Qazaq memlekettik sırk ǵımaratynda ALMATY CIRCUS FESTIVAL halyqaralyq sırk óneri festıvaliniń resmı jabylýy ótti. Bul kúni úzdik ártister saltanatty túrde marapattaldy, sondaı-aq onyń sońy gala-shoýǵa ulasty. Festıvál uıymdastyrýshylary ártister arasynda úsh júldeli oryndy, sondaı-aq arnaıy syılyq – Gran-prıdi taǵaıyndady. Ony arnaıy Gran-prıdi «Qurmet» ordeniniń ıegeri Qanatbek Kúnǵojınov «Nomad» (Qazaqstan, Almaty) atty akrobatıkalyq nómirimen aldy. Altyn júldeni Vetnam, Iakýtıa jáne Reseı sırk ártisteri ózara bólisti. Kúmisti Ózbekstan, Qazaqstan jáne Vetnam sırkteri jeńip aldy. Qola júldeni Germanıa, Belarýs, Tájikstan jáne Lıtva ártsiteri ıelendi.
Sheteldik sırk ónerpazdary úshin qosymsha nomınasıalar boıynsha arnaıy syılyqtar qarastyryldy. Sonymen, Reseı, Vetnam, Tájikstan jáne Belarýstan kelgender «Mamontenok-2024» VII Halyqaralyq sırk óneri festıvaline shaqyrýlar aldy, al Lıtvadan kelgen ártiske Germanıadaǵy «Winterzauber Event UG» Rojdestvolyq sırk qoıylymdaryn uıymdastyrý jónindegi kompanıa dırektorynyń shaqyrý-kelisimsharty berildi.
«Sırk maneji festıváldiń barlyq qatysýshylary men qonaqtary úshin dostyq qarym-qatynas jáne jańa ártistermen tanysý alańyna, elder men ártister arasynda perspektıvaly jáne jemisti jumys qatynastaryn ornatý múmkindigine aınaldy. Bul jyl saıyn ótkiziletin alǵashqy festıvál», - dep atap ótti festıváldiń qoıýshy-rejısseri, Ýdmýrt Respýblıkasynyń Halyq ártisi jáne rosgosırktiń bas rejıseri Elena Petrıkova.
Sırk ónerin saqtaý jáne damytý maqsatynda Almaty qalasy ákimdiginiń qoldaýymen Almaty CIRCUS FESTIVAL halyqaralyq sırk óneri festıvali ótti. Festıvál uıymdastyrýshylary jyl saıyn osyndaı is-shara ótkizýdi josparlap otyr.
Almatyda ALMATY CIRCUS FESTIVAL baǵdarlamasy 27 tamyzǵa deıin jalǵasady. Qoıylymdar Qazaq memlekettik sırkinde ótedi.
