Jıynǵa 2000-nan astam adam qatysady.
29 qyrkúıek pen 2 qazan aralyǵynda Almatyda Halyqaralyq Almaty Mount Fest taý sporty festıvali ótedi, dep habarlaıdy Almaty-akshamy.kz
İs-sharany Almaty qalasynyń Týrızm basqarmasy uıymdastyryp otyr.
Festıvál ótken jylǵydaı jarystyń 4 túrin qamtıdy, oǵan 2 myńnan astam kásipqoı sportshy men belsendi demalysty unatatyn áýesqoılar qatysa alady. Olarǵa týrıada, downhill, skyrunning men alpınıadada ózderin synap kórý usynylyp otyr.
Budan bólek, Almaty Mount Fest 2023 uıymdastyrýshylary 6 men 14 jas aralyǵyndaǵy balalar jáne múmkindigi shekteýli jandarǵa arnap, taýǵa shyǵý men týrıadanyń arnaıy baǵyttaryn daıyndap qoıǵan. Festıváldiń negizgi sporttyq jáne mádenı sharalary "Medeý" men "Shymbulaq" taý shańǵysy shıpajaıynda ótedi.
"Almatylyqtar men ońtústik astanamyzdyń qonaqtary arasynda ıgi dástúrge aınalǵan Halyqaralyq taý sporty festıvaliniń ótetinin habarlaýǵa qýanyshtymyz. Almaty sheteldik týrıserdiń kelýi jaǵynan kósh bastap tur, shaharda saıahattaýshylarǵa jaıly jaǵdaı men jaqsy múmkindikter jasalǵan, qala ınfraqurylymy da damyǵan", - deıdi Almaty qalasynyń Týrızm basqarmasy jetekshisi Ǵalıa Toqseıitova.
Festıvál sońynda aýqymdy iskerlik Forým ótedi. Onyń taqyrybyna taý týrızmin damytýdyń jańa múmkindikteri, onyń ishinde ekologıalyq turaqty saıahattar, demalysty uıymdastyrýdyń kreatıvti formattary, sondaı-aq, taýly aımaqtaǵy ınklúzıvti týrızm máseleleri arqaý bolady. Pikirtalas alańyna qatysatynyn Andorra, Fransıa, Qyrǵyzstan, Reseı, Grýzıa, Italıa men basqa da elderdiń halyqaralyq sarapshylary rastap qoıǵan.
Qatysýshylardy tirkeý 22 qyrkúıekte bastalyp, 28 qyrkúıekke deıin jalǵasady.