Búgin, 17 qarashada, Almatyda Halyqaralyq stýdentter kúni atalyp ótip jatyr. Mereke aıasynda qalada stýdentterdiń belsendi ómiri men jastar áleýetin damytýǵa arnalǵan ALMATY STUDENT’S WEEK 2025 aptalyǵy uıymdastyryldy.
11 qarashadan bastap Almaty qalasynyń ákimdigi joǵary oqý oryndarymen birlesip jastardyń shyǵarmashylyq, zıatkerlik jáne áleýmettik áleýetin ashýǵa baǵyttalǵan keshendi is-sharalar uıymdastyrdy. Aptalyqtyń barlyq baǵdarlamasy stýdentterdiń tikeleı qatysýymen júzege asyrylyp, olardyń bastamashyldyǵyn jáne azamattyq ustanymyn aıqyn kórsetti.
Qaladaǵy 35 joǵary oqý ornynda 150-den astam is-shara ótip, 40 myńnan astam stýdentti qamtydy. Shyǵarmashylyq keshter, ıntellektýaldyq oıyndar, sporttyq jáne ekologıalyq aksıalar, qaıyrymdylyq bastamalary ár kúnniń ózindik taqyryptyq baǵyty boldy. Ásirese, Prezıdent Qasym-Jomart Toqaevtyń «Ádiletti Qazaqstan adal azamattan bastalady» degen ıdeıasyn ilgeriletýge erekshe mán berildi.
«Zań jáne tártip» jáne «Taza Qazaqstan» aksıalary aıasynda Taza Campus chellendji, StudSport olımpıada júldegerleriniń dáristeri, Jas IQ zıatkerlik oıyndary, kınokórsetilimder men akýstıkalyq keshter ótti. Sonymen birge «Almatynyń úzdik stýdenttik toby» anyqtalyp, baıqaýdyń júlde qory 1 mıllıon teńge boldy.
Búgin aptalyq Jana Beles úlken festıvalimen jáne qalalyq Student Life KTK stýdenttik oıyndarynyń fınaldyq kezeńimen aıaqtalady.
Aıta keteıik, shahardaǵy 35 joǵary oqý ornynda 210 myńnan astam stýdent bilim alyp júr. Almaty eldegi eń iri bilim berý ortalyǵy, jas býyndy jańa beleske yntalandyratyn bilim qalasy.