Almatyda Halyqaralyq «International Haileybury FIRST Championship» chempıonatynyń jeńimpazdary anyqtaldy. Olar: «Champions Award» nomınasıasynda Oral qalasynyń «HighTech» komandasy, «Winning Alliance Captain» nomınasıasynda Almaty qalasynyń «Balga men Shege» komandasy, «Inspire Award Winner» nomınasıasynda Jańaózen qalasynyń «Rebels» komandasy.
Ár nomınasıa boıynsha chempıonat jeńimpazdary men úzdik nomınasıa ıegerleri Bilim basqarmasynyń dıplomdarymen jáne baǵaly syılyqtarmen marapattaldy. Sondaı-aq, úzdik nátıje kórsetken oqýshylarǵa Qazaqstan-Brıtan tehnıkalyq ýnıversıteti men «Turan» ýnıversıtetiniń bilim granttary tabys etildi. International Haileybury FIRST Championship chempıonatyna Qazaqstan, Birikken Arab Ámirlikteri, Qyrǵyzstan jáne Ózbekstan barlyǵy 250-den asa oqýshyny qamtıtyn 36 mektep komandalary qatysty.
Robototehnıka boıynsha halyqaralyq International Haileybury FIRST Championship chempıonatyn Almaty qalasynyń Bilim basqarmasy «USTEM Robotics» qorymen jáne Haileybury Almaty halyqaralyq mektebimen birlese otyryp, Almatyda 2023 jyldyń 28-29 maýsymynda ótkizdi.
Chempıonattyń negizgi maqsaty – ǵylym, tehnologıa, ınjenerıa jáne matematıka (STEM) salasyndaǵy daǵdylardy damytý; ǵylym, tehnologıa jáne tehnıka salasynda sheteldik ujymdarmen tájirıbe almasý; túrli shet elderdiń jastary arasyndaǵy qarym-qatynas pen dostyqty nyǵaıtý.
Chempıonat 2 kategorıa boıynsha ótti: FIRST LEGO League Challenge jáne FIRST Tech Challenge. Qatysýshylardyń jas sanaty 10-18 jas aralyǵyn qamtydy.
Halyqaralyq chempıonat jobalardyń tehnıkalyq aspektilerin ǵana emes, sonymen qatar komandalardyń kreatıvtiligin, tıimdiligin jáne birlesip jumys isteý qabiletin baǵalaıdy, bul jarysty odan ári qyzyqty jáne tartysty etedi, sondaı-aq, robototehnıka salasyndaǵy eń jarqyn jáne eń daryndy jastarǵa arnalǵan úlken baıqaý bolyp tabylady.
Jyl saıyn robototehnıkamen aınalysatyn balalar sany artyp, osy baǵyttaǵy úılesimdi jumystyń nátıjesinde almatylyq mektep oqýshylary robototehnıkadan úzdik nátıjeler kórsetip keledi.
Qazaqstandaǵy robototehnıka tarıhynda alǵash ret Dallas qalasynda (AQSH) ótken Vex Spin Up kategorıasy boıynsha álem chempıonatynda Almatynyń qurama komandasy úzdik ondyqqa kirip, óz dıvızıonyndaǵy 80 komanda arasynan aldyńǵy qatardan kórindi.
Sondaı-aq, almatylyq oqýshylar Húston qalasynda (AQSH) ótken FIRST World Championship álem chempıonatynda birden úsh nomınasıany jeńip aldy. Úndistannyń Pýna qalasynda FIRST Tech Challenge India Championship 2023 týrnırinde bizdiń oqýshylar bedeldi Finalist Alliance Captain Award syılyǵyna ıe boldy.
Chempıonat robototehnıka salasyndaǵy ózara tájirıbe almasatyn jáne shabyttandyratyn biregeı alańǵa aınaldy jáne jan-jaqtan jınalǵan jas qatysýshylar óz sheberlikterin kórsete otyryp, ǵylym men tehnologıanyń bolashaq kóshbasshylary bolýǵa múmkindik aldy. Bul Qazaqstandaǵy STEM baǵytyn damytýdaǵy úlken jáne jemisti joldyń bastamasy.