“Qazaq Stroy” qurylys kompanıasymen birlesken álemdik tájirıbe sátti júzege asyryldy.
Búgin Almaty qalasynyń Naýryzbaı aýdanyndaǵy “AlemCity-1” turǵyn úı keshenindegi polısıa pýnktiniń saltanatty ashylýy ótti, dep habarlaıdy Almaty-akshamy.kz.
Polisia.kz-tiń aqparaty boıynsha, resmı saltanatty sharaǵa qalalyq polısıa departamenti men qurylys kompanıasynyń ókilderi qatysty. Eki tarap ta bul jobanyń mańyzdylyǵyn, qajettiligin atap ótti. Qurylys salýshy kompanıa turǵyn úı kesheninen polısıa ýchaskesiniń tolyqqandy jumys isteýi úshin barlyq qajetti zattarmen jabdyqtalǵan, aýdany 30-40 sharshy metr ǵımaratty bóldi. Qazirdiń ózinde bul pýnktterge turǵyn úı keshenderiniń aýlalary men kireberisterine, sondaı-aq irgeles aýmaqtardan kameralar kirgizildi, bul táýlik boıy qaýipsizdik pen tártipti baqylaýǵa múmkindik beredi.
«Qala ishindegi qala»qaǵıdaty boıynsha salynǵan zamanaýı turǵyn úı keshenderi – bul úlken aýmaqty, ózindik ishki ınfraqurylymy bar jáne turǵyndar sany kóp aýqymdy jobalar. Máselen, bul turǵyn úı kesheninde 6 myńnan astam adam turady. Munyń barlyǵy ishki ister organdarynan erekshe nazar men baqylaýdy qajet etedi. Belgili bir turǵyn úı kesheniniń ortalyǵynda ornalasqandyqtan, ýchaskelik ınspektorǵa óz mindetterin oryndaý ońaıyraq bolady. Árbir turǵyndy tanı otyryp, barlyq qajetti aqparatqa ıe bolady. Mundaı format, bizdiń oıymyzsha, qylmys deńgeıin kúrt tómendetip, bir aımaqtaǵy krımınogendik jaǵdaıdy jaqsartýǵa múmkindik beredi. Bul tájirıbe turǵyn úı alqaptary sanynyń, qala aýmaǵynyń ulǵaıýyna, halyq sanynyń ósýine baılanysty jáne birden-bir maqsat – zańdylyqty, azamattardyń qaýipsizdigin qamtamasyz etýdi jáne jedel áreket etýdi kózdeıdi», – dedi Naýryzbaı aýdandyq polısıa basqarmasynyń bastyǵy Muhamedáli Seısenuly.
«Buǵan deıin Memleket basshysy óz Joldaýlarynyń birinde reformalar men jumysty “Qoljetimdi polısıa” qaǵıdaty boıynsha uıymdastyrý qajettiligin atap ótti, munda basty ról ýchaskelik polısıa qyzmetkerine júkteledi. Ol óz aýdanynyń turǵyndaryna tanymal, qoljetimdi, azamattar úshin bedeldi jáne olardyń quqyqtaryn qorǵaýy qajet. Adamdarǵa jaqynyraq bolýy kerek. Osy qaǵıdany negizge ala otyryp, biz jobaǵa belsendi túrde qatysyp jatyrmyz jáne turǵyndardyń qaýipsizdigi úshin basqa turǵyn úı keshenderimizde jańa ýchaskelik pýnktterdi ashýdy josparlap qoıdyq. Jaqyn arada basqa da turǵyn úı keshenderinde jańa polısıa pýnktteri ashylady», – dedi «QazaqStroy»basqarýshy dırektory Bolat Ibragımuly.
2021 jyldan bastap polısıa pýnktterin TÚ-diń ózinde ornalastyrý tájirıbesi engizildi. Búginde mundaı joba alǵash ret qurylysshy men PD arasynda óteýsiz negizde júzege asyrylyp jatyr. Qyzmettik polısıa quqyq tártibin qamtamasyz etý salasyndaǵy máselelerdi birlesip anyqtaý jáne sheshý úshin quqyq qorǵaý organdary men azamattar arasynda turaqty seriktestik ornatýǵa negizdelgen.