Almatyda kópjyldyq jáne birjyldyq dekoratıvti ósimdikterdi otyrǵyzý jumystary bastaldy. Gúlmen abattandyrylatyn aýmaqtyń jalpy kólemi shamamen 185 myń sharshy metrdi quraıtyn bolady, dep habarlaıdy Almaty-akshamy.kz.
Qalada raýshan, qyzylkúreń, kolambýs, abba, lavanda, sálben, qaztamaq, gortenzıa jáne ózge de dekoratıvti ósimdikter otyrǵyzylady. Jol jıekterine maýsymdyq gúlderden soń kelesi maýsymda ósip shyǵatyn gúl túpteri otyrǵyzý yńǵaıly bolýy úshin birjyldyq ósimdikter egiledi.
Mamandar badanaly ósimdiktermen qatar, kópjyldyq jáne birjyldyq gúlderdi de egedi. Qazirgi kezde kópjyldyq ósimdikterdiń úlesin arttyrý boıynsha jumystar kezeńmen júrgizilip jatyr. Búginde kópjyldyq ósimdikter úlesin 60%-ǵa jetkizý josparlanǵan.
Gúlder klımattyq jaǵdaılarǵa, kólemi men qalpyna, gúlzarlardyń kólemine jáne sándigine qaraı tańdalady. Bıyl kópjyldyq gúlderdi 15 mamyrǵa deıin, birjyldyq ósimdikterdi 10 maýsymǵa deıin otyrǵyzady. Al badanaly ósimdikter qazan jáne qarasha aılarynda egiledi.
Bıyl sýarý jumystaryn qala boıynsha kúsheıtý josparlanǵan. Memlekettik jeke seriktestik aıasynda qalany dekoratıvti kógaldandyrý jumystaryna 400 maman men 50 birlik tehnıka jumyldyryldy.