Stýdentter men jas ǵalymdar arasynda «Kákishuly oqýlary» uıymdastyryldy
Almatyda kórnekti ádebıettanýshy ǵalym, synshy Tursynbek Kákishevtyń 95 jyldyǵy atalyp ótti, dep habarlaıdy Almaty-akshamy.kz «Habar 24» telearnasyna silteme jasap.
Mádenı shara aıasynda qaıratker turǵan kópqabatty úıdiń qabyrǵasyna eskertkish taqta qoıyldy. Qazaq ádebıetiniń qaıratkeri týraly shákirtteri men urpaqtary estelikterimen bólisti. Profesor Tursynbek Kákishuly qazaq ádebıettaný ǵylymyn tyń jańalyqtarmen baıytyp, qazaq kórkem synynyń tarıhyn zerttegen. Sáken Seıfýllınniń ómiri men shyǵarmashylyǵyn zerttep, Sákentaný ǵylymynyń negizin qalady. Ǵalym jıyrmaǵa jýyq kitap jazǵan. Onyń jeteýi Sáken Seıfýllınge arnalǵan. Buǵan qosa mektep oqýshylaryna arnap oqýlyqtar jazdy.
«Sákendi tanytýdaǵy úlken eseli eńbegi, Maǵjan men Sáken ekeýin jarystyryp otyryp, Maǵjannyń atyn aıtýǵa bolmaıtyn sol anaý ǵasyrdyń alpysynshy jyldary, jetpisinshi jyldary taıaǵyn jep júrip, Maǵjannyń atyn taıǵa tańbadaı etip basqan. Sáken ekeýiniń kelisken kezinde, keńesken kezinde ekeýiniń arasyndaǵy úlken tamyrly baılanysty bir ǵajap zertteýshilik sheberlikpen jazyp edi», - deıdi aqyn, dramatýrg Nurlan Orazalın.
Sondaı-aq ǵalym uzaq jyl eńbek etken ál-Farabı atyndaǵy Qazaq ulttyq ýnıversıtetinde ǵylymı konferensıa ótti. İzbasarlary Tursynbek Kákishev shetelge shyqqan saparlarynda qazaq halqynyń ádebı-mádenı muralaryn izdestirip, elge ákelýshi edi dep eske aldy. Konferensıa barysynda ádebıetshiler men qoǵam qaıratkerleriniń Tursynbek Kákishev týraly jazǵan estelikteri men zertteýleri toptastyrylǵan jınaq tanystyryldy. Stýdentter men jas ǵalymdar arasynda «Kákishuly oqýlary» da uıymdastyryldy. Oǵan 3 nomınasıa boıynsha 60-tan astam jumys qabyldanǵan. Jeńimpazdar arnaıy dıplom jáne aqshalaı syılyqpen marapattalady.