Esirtki satýmen aınalysqan kúdiktiler bólshek saýda úshin “taýardy” qaıdan jáne qalaı alatynyn aıtyp berdi.
Esirtki qylmysyna qarsy kúres basqarmasynyń málimetinshe, qazirgi ýaqytta sıntetıkalyq esirtkini kóterme de, bólshek saýdada da satýshylardy anyqtaý boıynsha maqsatty jumystar júrgizilip jatyr. Ótken aptada ǵana qalada 8 esirtki satýshy ustaldy, dep habarlaıdy Almaty-akshamy.kz Polisia.kz-ke silteme jasap.
Qylmystyń jasalý mehanızmin saralaı kele, polısıa qyzmetkerleri, “kóterme saýdagerler” Almaty oblysyndaǵy jumys berýshilerden taýar alatynyn anyqtady. Ádette, “qoımalar” qaraýsyz qalǵan nemese taýly aımaqqa ornalastyrylady.
1. 29 jastaǵy T. esimdi azamat. Odan 1,5 keliden astam esirtki tárkilendi.
– Meni polısıa qyzmetkerleri Alǵabas shaǵyn aýdanynda ustady. Bul sıntetıkalyq zattardy men Almaty oblysyndaǵy Qaskeleń aýdanynda betbelgiler arqyly kóterdim. Meniń páterimnen barlyǵy 1,5 keli tabyldy. Zańsyz jumys jasaýǵa kiriskenime ókinemin. Báribir túrmege túsesiń, báribir ustalasyń, – dedi ol.
2. 22 jastaǵy S. esimdi azamattan zańsyz aınalymdaǵy 110 býma sıntetıkalyq esirtki zattary tárkilendi. – Men “paketti alyp barasyń, sosyn aqsha jiberedi” degen nusqaý aldym. Men muny aptasyna eki ret jasadym. Úshinshi rette meni polısıa toqtatty, – dedi óz sózinde S. esimdi azamat.
3. Taǵy bir 22 jastaǵy J. esimdi azamattan da zańsyz aınalymdaǵy 110 býma sıntetıkalyq esirtki zattary tárkilendi. – Synyptasym sómkeni aparyp berýdi ótindi. Birinshi rette qolymnan keldi, ekinshisinde ustaldym. Barlyǵyna kúmándi jumystarmen aınalyspaýǵa keńes beremin, – deıdi ol.
4. 18 jastaǵy A. esimdi azamattan 1 keli 400 gramnan astam sıntetıkalyq esirtki tárkilendi. – Polısıa qyzmetkerleri meni mef esirtkisin qoıyp jatqanymda ustady. Qazir jaǵdaıym óte nashar: jeńil aqshanyń sońynan kettim. Jastarǵa esirtki satýmen aınalyspaýlaryn suraımyn, áıtpese búkil ómiriń qurtatynyn eskertemin, – dep túıindedi A. esimdi azamat.