Almatyda qamqor azamattardyń bastamashyl tobynyń qatysýymen Dımash Qudaıbergenniń qabyrǵa sýretin qaıta qalpyna keltirý jumystary bastaldy.
2020 jyly Almatydaǵy Seıfýllın men Qabanbaı batyr kósheleriniń qıylysyndaǵy úıge Dımashtyń jankúıerleri onyń qurmetine qabyrǵa sýretin – mýralyn salǵan bolatyn. Mýraldy almatylyq sýretshi Batyr Sádýaqasov saldy.
Úsh jyl boıy qala turǵyndary álemge áıgili qazaq balasynyń beınesine tamsanyp kelgen. Alaıda sońǵy ýaqytta sýret kómeski tartyp, tipti búlinýge aınalǵan.
Ótken senbide Dımashtyń mýralynyń mańyna adam kóp jınaldy. Bastamashyl top, Dımashtyń fanattary men qala halqynyń kóz aldynda sýretshiler mýraldy qaıta óńdeýdi Dımashtyń ádemi ánimen bastady.
Sýretshi B.Sádýaqasov.
«Joba úlken qıyndyqpen jasaldy. Resmı organdardan ruqsat alý men qarjy tabý biraz qolbaılaý boldy. Budan bólek, boıaýǵa, rolıkterge, munarany jalǵa alýǵa, proektorǵa aqsha kerek. Almatylyq kásipkerlerdiń biri bastamany qoldap, álemniń 65 eline belgili qabyrǵa sýretin jasaýǵa demeýshilik etti. Eń bastysy, Almaty Dımashtyń sýreti salynǵan alǵashqy qala boldy. Ótken jyldyń kúzinde ákimdik mýral salynǵan úıge jóndeý jumystaryn júrgizdi, onyń barysynda qabyrǵa jabyny aıtarlyqtaı búlingen», – deıdi qabyrǵa sýretin jasaýǵa bastamashy bolǵandardyń biri Erlan Ibragım.
Qalalyqtardyń bastamashyl toby mýraldy qalpyna keltirýge qarajat jınap, jóndeý jumystaryn júrgizýge qala ákimdiginiń kelisimin aldy.
Osyǵan deıin Almaty qalasynda Qabanbaı batyr men Sáken Seıfýllın kósheleri qıylysynda mýral salynǵanyn Dımash Qudaıbergenniń ózi de Instagram paraqshasynda jazǵan.
«Jerlesterdiń syılyǵyn kórgende júregime jylýlyq ornap, ishteı rahmetimdi aıtqan bolatynmyn. Alaıda Dımash Qonaevtaı uly tulǵalarymyz turǵanda jas býyn ókili óziniń alyp sýreti jaıly jar salǵany uıat bolar dedim de, úndemedim. Qazirgi tańda osynsha qıyn jumysqa eńbek etken azamattarǵa alǵys aıtýdy jón kórip otyrmyn»,– dep jazdy ol.
Sondaı-aq Dımash sýretshilerge de bylaı dep alǵys aıtty:«Qadirli sýretshiler, qoldaryńyz dert kórmesin, týyndylaryńyz jer sharyn sharlap, qazaqtyń atyn bıikke kótersin. Jáne barsha qoldaýshylaryma shyn júrekten alǵys bildiremin. Kóp raqmet!»
Mýral salý bastamasyn qoldaǵandardyń biri – brondy kólik shyǵaratyn «QazaQstan Paramaýnt Injınırıń» kompanıasynyń negizin qalaýshy, Ekonomıkalyq Ultshyldyq qozǵalysynyń lıderi Aıbek Barysyov.
Májilis depýtattyǵyna kandıdat A.Barysov:«Bizdiń Dımash Qudaıbergen – qazaq halqynyń, barsha elimizdiń maqtanyshy. Ol Qazaqstannyń sımvolyna aınaldy. Dımash arqyly qazir elimizdi búkil álem biledi. Sondyqtan mundaı mýraldar – onyń shyǵarmashylyǵyn nasıhattaý, ónerin baǵalaý jolyndaǵy az ǵana úlesimiz», – dedi.
Dımashtyń jankúıerleriniń biri, 72 jastaǵy Asterhan Sársenbaevanyń qýanyshynda shek joq.
Dımashtyń jankúıeri A.Sársenbaeva.
«Dımashtyń konserti qaı jerde ótse de, barýǵa tyrysamyn. Astanadaǵy, Dýbaıdaǵy konsertterinde boldym. Dımash men úshin asa qymbat jan, ol qazaqtyń ánderin álemdik sahnaǵa alyp shyqty. Súıikti ánshimizdiń mýralyn qaıta jasaýǵa qol ushyn sozǵan Erlan Ibragımge, Aıbek Barysovqa, Emıne Qojamuratovaǵa alǵysym sheksiz», – dedi A.Sársenbaeva.