Almatyda esepteý quraldary joq turǵyndarǵa sýdy tutyný normalary ózgerdi

Memleket basshysynyń halyqqa «Ádiletti Qazaqstannyń ekonomıkalyq baǵyty» Joldaýynda bergen tapsyrmasyna sáıkes, 2023 jyly tabıǵı monopolıalar salasyn retteýdiń jańa tarıftik saıasaty – «Investısıa ornyna tarıf» qabyldandy. Onyń basty maqsaty – ınjenerlik ınfraqurylymdy jańǵyrtý jáne resýrstardy, ásirese sýdy utymdy paıdalaný, dep habarlaıdy aqshamnews.kz

Qazirgi ýaqytta Qazaqstanda jeke tulǵalar úshin aýyz sýdy tarıfteý qaǵıdattary qaıta qaraldy, onyń aıasynda «tutynýdyń áleýmettik normalary» engizildi. QR Ulttyq ekonomıka mınıstrliginiń Tabıǵı monopolıalardy retteý komıtetiniń málimeti boıynsha, jańa tarıfteý algorıtmi «neǵurlym kóp tutynsańyz, soǵurlym kóp tóleısiz» qaǵıdasyn ustanady. Bul sýdy únemsiz paıdalanatyn tutynýshylar úshin tarıfterdiń qymbattaýyn bildiredi.

Osy sharalar aıasynda sýdy utymdy paıdalaný yntalandyrý maqsatynda Almatyda esepteý quraldary joq tutynýshylar úshin jańa sý tutyný normalary qabyldandy. «Almaty Sý» MKK habarlaýynsha, bul normalar 1989 jyldan beri alǵash ret ózgerdi. Qujatqa sáıkes, 2025 jyldyń qańtarynan bastap sýdy jáne kárizdi esepteý úshin jańa mólsherlemeler engizildi.

Esepteý quraldary ornatylmaǵan úılerdiń turǵyndary úshin tólem myna normalar boıynsha esepteledi:

-              Ár tirkelgen adamǵa aıyna 15 tekshe metr sý tutyný qarastyrylǵan. İs júzindegi tarıf boıynsha tólem 2 217,60 teńge;

-              Eger ortalyqtandyrylǵan káriz júıesi bolsa, ár adamǵa qosymsha 687,96 teńge alynady.

1989 jyldan beri qoldanylyp kelgen burynǵy normalar aıtarlyqtaı tómen bolatyn: jeke úıler úshin bir adamǵa aıyna 3-6 tekshe metr, páterler úshin – 8,4 tekshe metr. Bul eskirgen normalar tutynýshylardy eseptegish quraldaryn ornatýǵa nemese sýdy únemdeýge yntalandyrmady. Sonyń nátıjesinde qazirgi ýaqytta tek 65% turǵyn úıler sý eseptegishterimen jabdyqtalǵan.

«Almaty Sý» MKK mamandarynyń aıtýynsha, buryn jeke úıler ortalyq komýnıkasıalarǵa qosylmaǵan bolatyn. Qazirgi ýaqytta qabyldanǵan sharalardyń arqasynda jeke sektor belsendi túrde qalanyń ınjenerlik júıelerine qosylyp jatyr. Sonymen birge, zamanaýı úılerde birneshe sanıtarlyq toraptardyń, monsha, saýna jáne baseınderdiń bolýyna baılanysty sý tutyný kólemi ósti.

Sýyq sýmen jabdyqtaý jáne káriz qyzmetteri boıynsha qoldanystaǵy tarıftermen, sondaı-aq sý eseptegish quraldary joq tutynýshylarǵa arnalǵan tólemder mólsherimen «Almaty Sý» MKK-nyń resmı saıtynda (almatysu.kz) tanysýǵa bolady. Sondaı-aq saıtta sý esepteý quraldaryn ornatý jáne tekserý boıynsha lısenzıalanǵan uıymdardyń tizimi jazylǵan.

Osyǵan baılanysty, Almaty qalasynda áleýmettik kómek kórsetý, mólsherin belgileý jáne muqtaj azamattardyń jekelegen sanattarynyń tizimin anyqtaý qaǵıdalaryna sáıkes, ystyq jáne (nemese) sýyq sýmen jabdyqtaý jáne gazben jabdyqtaýǵa arnalǵan jeke esepteý quraldaryn satyp alý, ornatý nemese tekserý shyǵyndaryn óteý qarastyrylǵan. Bul kómekti jan basyna shaqqandaǵy ortasha tabysy úsh ese eń tómengi kúnkóris deńgeıinen aspaıtyn azamattar paıdalana alady. Árbir qurylǵy úshin shyǵyndardy óteý kólemi 3,4 (úsh bútin onnan tórt) aılyq eseptik kórsetkishten aspaıdy.

1) Memlekettik ataýly áleýmettik kómek jáne (nemese) turǵyn úı kómegin alatyn az qamtylǵan azamattar (otbasylar);

2) tórt jáne odan da kóp kámeletke tolmaǵan balalary bar kópbalaly otbasylar;

3) birinshi, ekinshi jáne úshinshi toptaǵy múgedekter;

4) Qazaqstan Respýblıkasy Áleýmettik kodeksiniń 207-babynyń 1-tarmaǵyna sáıkes jasyna baılanysty zeınetkerlerge beriledi.

Tutynýshylar ótemaqy alý úshin tirkelgen mekenjaıy boıynsha aýdandyq áleýmettik qamsyzdandyrý bólimine júginýi qajet.

Almaty qalasy Energetıka jáne sýmen jabdyqtaý basqarmasynyń «Almaty Sý» sharýashylyq júrgizý quqyǵyndaǵy memlekettik komýnaldyq kásipornyna tıesili, sýyq sýmen jabdyqtaý jáne sý burý qyzmetterine sý eseptegish quraldary joq tutynýshylar úshin tarıf mólsherleri: