Jas polısıa qyzmetkerleriniń jıynynda “Erlik sabaǵy” ótti
Almaty qalalyq Polısıa departamentinde erjúrek polıseılerge qurmet kórsetildi, dep habarlaıdy Almaty-akshamy.kz.
Jas polısıa qyzmetkerleriniń jıynynda “Erlik sabaǵy” ótti.
– Bul jaqsy dástúrge aınalǵan jyl saıynǵy shara. Ol únemi İİO ardagerleriniń qatysýymen ótedi. Bul joly biz adamdardy qutqarýda, tótenshe jaǵdaılar men aýyr qylmystardyń jolyn kesýde erekshe kózge túsken polısıa qyzmetkerlerin marapattaýdy qostyq. Maqsat – jas urpaqty patrıottyq jáne Otanǵa degen súıispenshilik rýhynda tárbıeleý, sondaı-aq ishki ister organdarynyń ımıjin arttyrý, – dedi Almaty qalalyq Polısıa departamenti bastyǵynyń orynbasary Oljas Myrzabekov.
Sharaǵa qatysýshylardyń qatarynda – Túrksib aýdanynyń polısıa qyzmetkerleri Nurjan Shatýnov pen Ǵazız Hamasqalıev te boldy. Eske salaıyq, bul tártip saqshylary anasy syrttaǵy dárethanaǵa laqtyryp ketken jańa týǵan náresteni aman alyp qalǵan bolatyn.
– Jas urpaq erjúrek áriptesterimizden úlgi alýy kerek. Bul polısıa qyzmetkerleri ómiri men densaýlyǵyna qaramastan, elimizdiń qaýipsizdigi men turaqtylyǵy jolynda Otanǵa aıanbaı qyzmet etýde. Olar zamanaýı polısıa qyzmetkerine tán qasıetterdi laıyqty alyp júr: kásibılik, jaýaptylyq, ádildik jáne t.b., – dep túıindedi Oljas Myrzabekov.
Sondaı-aq spıker elimizdiń eń iri shaharynda táýlik boıy qaýipsizdikti 6 myńǵa jýyq polısıa qyzmetkeri qamtamasyz etetinin atap ótti.